عواكيس

هل تؤيد ياستاذ معوكس ان تكون رئيس لجنة تعدل وتبدل على كيفك وتتخذ القرارات حسب المزاج؟
يزيد الشمري حائل
-حسب المزاج والانتقائية!
وليد الجيزاني
ماهو تفسيرك يابو المعاكسات لانتقال وليد الجيزاني من الأهلي الى الشباب ثم الى الحزم ثم الى الشباب؟
سعد الدريويش -مرات
-والله الحزم كنه مستودع صده ..رده!
صراحة ياصديقي معوكس شربت سفن اب وبيبسي وكولا ابي اهضم قرارات العمري والعواجي واللجنة الفنية والانضباط بس ما قدرت وش الحل؟
نواف الطريحي النعيرية
-ماتنهضم ولا بوايت!
ماذا تظن ايها الاستاذ ان يقدم هيكتور مع (العميد) وهل يعيده الى الذهب مثل ما سوى مع الشباب؟
فهد الدوسري - الحوطة
-حسب الجو المؤثر!
افدنا يامعوكس وش عمل الجيزاوي قدام القادسية، تصدق لو ما وقفته لجنة الانضباط ما حد دري؟
اشرف الحميد - الوجه
-انكشفوا وراحوا فيها!
الى الحبيب معوكس وش قصة بعض الأقلام كانت ضد إدارات أندية واليوم معها، اكيد فيه حاجة ما ندري عنها؟
رابح العنزي - رفحاء
-مافيه إلا عازف السمسمية معها إلين جابوه للمركز!
المخروش معوكس تصدق ودي أسدد لك ضربة قاضية ما عاد تكتب بعدها؟
نادر القاسم - بريدة
-والقفازات كليجا اويلاه!
يقولون يامعوكس من عشرين سنة وأنت تسدد إقساط وراء ما تشوف أمورك وتتلزق مع احد الهوامير؟
غالب الشهري - ابها
-الهوامير ضيعونا في الأسهم!
الأستاذ معوكس واضح ان الربدي فاهم بالقانون والدليل انه ما أخذ برأي رئيس اللجنة الفنية و أصر على عدم اعادة لقاء الشباب والفتح؟
سعود الهديريس - الدمام
-والنهاية اعفوه من وظيفة النائب!
ما تلاحظ يا معوكس ان بعض الإعلاميين كلامهم متناقض مثل مباراة الشباب والفتح يمكن بعضهم ماشافها ويتكلم على مايقرا والشباب ظلم في المباراة الأولى ولاقالوا شيء يمكن حاسدين الليث على النهائي الخامس
(ليث مرات)
-تبي تضحك مع التناقض تابع مساء الحراج!
يا ابو العواكيس . متي ناوي تعتزل وتسلم المهمة لغيرك.
عازف الليل - الهياثم.الخرج
-إذا وافقوا على إقامته في المشتل!
أسعد الله مساءك بكل خير جمعة مباركة إن شاء الله ( الجنتلمان عكوسي كوسي الغالي ) وش رايك بمستوى نادي العالمي ( النصر ) خلال المباريات الماضية بما فيها مع نجران ومن وجهة نظرك هل العالمي سيحقق بطوله هذا الموسم تكفى تكفى بدون كور لافه وشكرآ .
أخوك / علي الخيبري - الرياض
-البطولة اللي عليها الكلام حققها!
أخي العزيز ابو العواكيس .. تحية طيبة .. ألا تزعجك تصرفات بعض المراهقين من المشجعين اللي يتشمتون ويضحكون ويحتفلون إذا تعثر منافسهم (المتصدر) .. أكثر من فرحتهم لفوز فريقهم .. على الرغم من أن فريقهم ينافس على المركز الرابع فقط؟
محمد سلمان - الرياض
-ولايهونون مراهقي خط الفتنة!
الدكتور معوكس صباح الخير أبسألك عن نجوم تلألأت في سماء النجوميه ثم اعتزلت ولم يتم تكريمهم ولماذ لايستفاد منهم (عادل المجنون وبندر جارالله ويوسف جازع وصلاح المولد وتوفيق مقرن وجمال محمد.وغيرهم .
عبدالله صفوق العبيوي - المصيف
-يارجال لو تلالأت صدق كرموها!
الغالي معكوس: ليش إداره النصر فرطوا بيوسف الموينع للأهلي والله نجم وأحسن لاعب محور؟
سلمان الاسمري - جدة
-لسانك حصانك!
الاخ معوكس تحية طيبة وبعد لو طلبوا منك ترشح أفضل لاعب كاراتيه من ترشح ؟لو سألتني اقول أفضل لاعب اسامة المولد !خصوصا بعد ضربه السهلاوي؟
محبكم ابومحمد - روضةسدير
-وينافسه برناوي!
يابوالعواكيس ... القيصومة لابسة الحلة الخضراء ربيع وأجواء دافئة كل سنه تقول بزوركم .. ومانشوفك. لو انك عاد المدير التنفيذي بميكروسفت ما انشغلت كذا؟
بدر اليعقوب - القيصومه(فله)
-لابسه الحلة والا البطحاء!
أخ معوكس : هل صحيح أن الأهلي عندما خسر من الهلال كان السبب التحكيم وأن الحكم هو من سجل الهدف الرابع ؟!!
سفير الحلة - الخبراء
-اجل الأهداف الثلاثة اللي قبل سجلها المراقب!
عزيزي معوكس المحترم: في كأس ولي العهد هل تتوقع أن النصر يسويها ثانية في الهلال وكم تتوقع ؟
صديقك عبدالله الحميد - مرات
-كلش صادر ووارد!
صراحة يامعوكس انا معجب بتحليلات المهنا ونقده للحكام؟
غانم السلمي - الطائف
-الله أكبر نسى نفسه وعيون خميس العويران والتخبيص اللي ماله أول ولا اخر!
معوكس بما أنك خبير ليه اللاعب المصري حسام غالي لاعب النصر لم تصدر بحقه لجنة الانضباط أي قرار إيقاف رغم أنه أسال دماء و خنق لاعبين ؟
فهد ماجد- الرياض
-بلا أسمه غالي مهوب رادوي!
هلا أبو العواكيس : في برنامج (الجولة) عمل البرنامج تحليلاً لكيفية تحقيق الاتحاد والنصر لبطولة الدوري متجاهلين الشباب ليه ؟
أبو طلال
-الشباب يلعبون بلوت!
الاخ معوكس في حلقة كل الرياضة يقول حاتم خيمي أن الهلال حقق الدوري لانه ضعيف مادري ليش حاقد على الهلال هل لانه مايقدر يفوز عليه منذ أن لعب مع الوحدة حتى إعتزاله!
أحمد العتيبي -الخبر
-اللي مايطول العنب يقول عنه حامض!
أحلى معوكس تحية
ماهو رايك بعدم رفع الكثيري لرايته رغم تسلل مالك مرتين
صديقك -عبدالملك المرشد عرقه
-مالك كنه طائر النورس حلق ..حلق وجت سليمة!