جرح يصيح وجرح صمته معاني

لا عاش ابو ذا الحب لا عاش لا كان
اللي طعني تحت حدب المحاني
حتى غديت لنايد الناس عنوان
سيرة الم ما بين قاصي وداني
وحتى شمت في عثرتي واطي الشان
وزود طعوني مع بلاوي زماني
ما قال سالم وان عثر كبوة حصان
همه الى قالوا زماني وطاني
وهمي مطارق والزمن صار سندان
ما بينها صامد واعاني مكاني
مجروح جرحين توارت بالاحزان
جرح يصيح وجرح صمته معاني
وانزف مواويل الغلا وارسم الحان
واكتب على ليل المواجع مغاني
واشيل فوق اكتوفي دهور وازمان
واحس حتى الدرب دربي جفاني
أنشهد انه موت لا همت في انسان
لا صار لا يرحم ولا هو يعاني
ودام الغلا خضب خفوقي بالاحزان
ابنتقم من كل جرح خذاني
انا ومن بعدي يجي الف طوفان
دام الجسد في تربة الأرض فاني
ما عاش من يكسر شموخي ولا كان
حتى ولو هو تحت حدب المحاني
سلطان فيحان الركيبي