كلاً بفاله راح وأنا بفالي

لا واهني اللي عن الماضي يتوب
ما عد الأشهر يومها والليالي
تفرقوا ربعي وأنا مالي ذنوب
لكن أبصبر صبر أبويه وخالي
العام الأول لي مع العرب مندوب
واليوم مندوبي تركني لحالي
روح بصوب ورحت أنا عنه في صوب
كلاً بفاله راح وأنا بفالي
لا طالباً منهم ولا ني بمطلوب
وقت مضى مرت شبيه الخيالي
له ذكريات وفيه واجب وما جوب
لاهل المكارم والوفا والكمالي
راعي المكارم دوم بالقلب مكتوب
دام الحياة وكل وقت بخيالي
روح التعامل له مجالات وأسلوب
يحرص عليها كل غالي وعالي
ما قال هذا عندنا غير مرغوب
وهذا فقير ماش عنده حلالي
ولا قال به راغب ولا غير مرغوب
رجل نماري فيه كل الرجالي
وافي الخصال وسالماً كل عذروب
معربٌ ما بين جداً وخالي
وشلون أسوي صار بالصدر لاهوب
الي تذكرنا كرام السبالي
في مجلس محكوم والضوء مشبوب
وغمر بدور بنايدات الدلالي
فنجالها يغنيك عن كل مشروب
يجلي العماس وينشرح كل بالي
في مجلس ما فيه هيس ورعبوب
أما حلا أبو زيد والا الهلالي
دام القدر يا صاحبي ياخذ الثوب
وش عاد باقي للفتى من توالي
نصيبها نوب ونخطي بها نوب
وأشره على الطيب الي جا مجالي
مبروك النامي