صوت الصورة

تسلم يديكن للأصاله والإبداع
ويسلم لنا تراثنا لكل الأجيال
نعم الهواية كلها فن وامتاع
وكان هي حرفة فأبرك للأموال
عبدالعزيز علي الصالح - حايل
ذا تراث أسلافنا في مهرجانه
من يبي شوفه يزور جنادريه
النطي للصوف والخوص بزمانه
إبدويه صوف والخوص إحضريه
فهد بن عقيل الطويان - بريدة
السدو.. والخوص.. يا زينه
حرفه قديمه من الجدان
تحكي لنا ماضي اسنينه
والكل في وقتهم فنان
عبدالكريم عبدالرحمن السلوم - القرائن
يا ما حلا جو ربيعي على الكيف
البيت يبنى والنشاما حواليه
به نشميتين هن يديرن السواليف
ما بين غزل وسف وعصور ماضيه
محمد بن عبدالعزيز الخنيفر - أشيقر
يا بنت شغلك وقته راح
الناس تبغى الرفاهيه
كم واحد قعد مرتاح
مرتاح في أرض السعوديه
شبيب بن حمود لقحطاني - المزاحمية
الجيدات من الحريم العفيفات
مدركات تراثهن ما أهملنه
أن هن صغار السن والا كبيرات
ما يلام من روحه تعلق بفنه
عبدالحميد الأحمدي - المدينة المنورة
ماجمل تعيش الحديث وتذكر الماضي
الناس هاذي ترى الأحياء خلايفها
لو شافها والدي أو والدك هاضي
حياة جداتنا كم هي كلايفها
عقاب بن سقيان العتيبي - الجمش
ماضي قديم وحاضراً فالصوره
رمز الأصالة والفخر بالوانه
سدو النسيج وخوصها المنشوره
يم الثمامه خابراً عنوانه
حمد عبدالله الوايلي - حوطة سدير
يا بكر شفت صورة وأعجبتني
في صفحةٍ كل جمعه تجينا
شفت البنات بشغلهن جبرني
هذا عمل مرغوب دنيا ودينا
عبدالرحمن بن منصور التركي - البكيرية
موروث أربع عقود يعاود الكره
به ذكريات تخلي العود يستانس
حرمه تسوي رواق ينصب ببره
وأخرى تسف المحافر لقط مجانس
سعود عبدالعزيز الهزاع - نعام
ما غيرك الزمان ولا غيرك موج
على السدو والخوص يا بنت شفناك
وقفتي في وجه الزمن وسنينه العوج
وعشتي حياتك رغم القسى لا عدمناك
خالد بن ناصر المخيمر
نرحب بمشاركاتكم حتى مساء الاثنين على الفاكس رقم 4871070 أو الإيميل الخاص بصفحة الخزامى: khozama@alriyadh.com زاوية (صوت الصورة) ونرحب بالصور التي يرسلها محبو هذه الزوية.. ويا هلا.