اللغز

الأسبوع الماضي كان لغز الأسبوع من طرح الشاعر باني فايز السبيعي من الأحساء والذي يقول:
يا ويش رجل يدخل باسم معروف
وليا خرج اسمه تغير حروفه
السمع يدري به ويجهل به الشوف
يمر بسهولة ونوب بكلوفه
وقد توصل للحل شعراً:
أنا عرفت الحل والحل مردوف
والحمد لله ما عليه كلوفه
بالاكسجين وثاني أكسيد موصوف
شهيق مع زفير هاذي وصوفه
ساير فالح الحنيني - الخرج
جواب حل اللعز من خمسة حروف
والفاهم الرموز الهدف ما تطوفه
هذا النفس يدخل ويخرج من الجوف
صعب النظر يقدر يحدد وصوفه
محمد هذال البريك
يا مرحباً يا باني اللغز موصوف
لو كان في وقت الضبابه تشوفه
هذا الشهيق إلا دخل داخل الجوف
يظهر زفير وكاملات وصوفه
صلاح بن عبدالله اليابس - رحيمة
لاهنت يا باني ترى اللغز معروف
حله بسيط ولا يبي له كلوفه
هذا النفس لا من دخل داخل الجوف
وليا ظهر كربون محد(ن) يشوفه
ناصر عبدالله القحطاني
لعز السبيعي يا هل العرف محيوف
ونا بحله ما عليه كلوفه
هذا الهواء لا من وصل داخل الجوف
اسمه شهيق او لا ظهر ما نشوفه
علي رشيد الرشيد - رياض الخبراء
الحمد لله خالق السمع والشوف
خالق الكون بكامل وصوفه
يسلم لسانك على نظم الحروف
التنفس نسمعه ولا نقوى نشوفه
طلال الفيحان - حائل
الحل جاك أموثقه وسط مظروف
يا صل رجال بالصحافة تحرفه
هذا الشهيق ابداخل الجسم معروف
ويطلع زفير أحيان فيه الكلوفه
محمد أبو دحيم - البدائع
ما ساق من قبله همليل وقنوف
سلام مع وردا جديدة اقطوفه
واللغز حله لا بغيناه ما بطوف
يدخل شهيق ويطلع زفير بضروفه
سالم بن ظفر
هذا اكسجين واكسده داخل الجوف
يدخل شهيق وبالزفير النكوفه
ويزداد بالسرعة مع الجهد والخوف
يسري مع الحيين ما أصعب وقوفه
سالم البشري - الجبيل
كما توصل للحل نثراً:
رشيد الهديرس - حائل، ظويهر عنيزان الصلج - الرياض، ناصر الهديرس - الرياض، فريح الفريحي - الرياض، مطير العنيزان - الرياض.
لغز الأسبوع
كتبه للصفحة الشاعر ضيف الله مسيب الروقي من الدوادمي ويقول:
يا ويش ورع معه سنين مزروعه
وليا انجرح من عروقه شي ما يبرى
دايم يضحي بنفسه لاجل مجموعة
لانقاذهم لا يصير مصيبة كبرى
نستقبل الحلول على الفاكس 4871070أو الإيميل: khozama@alriyadh.com