اللغز

الأسبوع الماضي وكان لغز الأسبوع من طرح الشاعر/ عبدالله الأطرش والذي يقول:
ياويش أبواب تجي عكس مالوف
متخالفه من دون قفل ومزلاج
وليا انقفل باب دخل شي معروف
وليا انفتح باب منع كل هراج
وقد توصل للحل شعراً كل من :
أهدى سلامي بالملايين واولوف
للصفحة اللي بالجريدة كما التاج
واللغز يا الأطرش لقيناه موصوف
تلقاه بالكاسيت مابين الادراج
علي رشيد الرشيد- رياض الخبراء
اللغز للأطرش به الجود معروف
للغير ماهو لاسمعناه محتاج
إحفظ شريطك لايجي بيد ملقوف
وإلا إضربته الشمس تلقاه منعاج
فهد بن عقيل الطويان- بريدة
يامرحبا ياشاعر اللغز مشيوف
هذاك بالكاسيت صابر له علاج
دامه مقفل فالخطر فيه محفوف
والى كسرت الباب وقفت الاحراج
سالم حبيب - الجبيل
يامرحبا والحل من أربع حروف
شريط والشرطان عندي بالأدراج
خايف على الأبواب من فعل ملقوف
هذا جواب اللغز ياشبه هداج
محمد بن عبدالرحمن أبو دحيم- البدائع
كما عهدنا أبو صالح له صنوف
الغاز جزلة لها مدخل ومخراج
أبواب شرطان الكست حدر ما يطوف
هذا الجواب وباكر الصبح ينباج
صلاح بن عبدالله اليابس- رحيمه
عبدالله الأطرش بالألغاز معروف
والحل واضح عندنا مثل هداج
تحت الشريط مربعات لهن شوف
هذا ترا حله ولا به لنا إحراج
فايز بن حماد الشمري- حائل
كما توصل للحل نثراً''
منيف سعد الشريهي/الرياض، ناصر الهديرس/ الرياض، دخيل الحسيني/ الرياض، مناجا سهيل المطيري/ حفر الباطن، خليفه سرحان الشراري/ القريان، منير فرحان العتيبي/ القصيم، هلال فنيدان الحربي / القصيم.
لغز الأسبوع
كتبه/ صالح عبدالله الزايد من القصيم ويقول:
خفرة مستكنه ياولد وش ترى
ماتخاف ولو إن النار في جوفها
إن خذت خطوة لا بد ترجع ورى
خفرة لا مسكت الشارع تشوفها
نستقبل الحلول فاكس 4871070 خزامى الصحارى- زاوية لغز الأسبوع.
كما نرحب بطرح الألغاز الجيدة والجديدة