فلاش

جمعتني الصدفة بواحد من الأطباء المسؤولين بطب الطوارئ في أحد المستشفيات.. ومع السواليف.. قال:
"تصدق تجيني بعض الحالات لبعض الشباب اللي صاير لهم حوادث مرورية، والحقيقة اني حزنت بشكل ما تتصوره لحالة جتني قبل يومين لاثنين من الشباب صار لهم حادث واحد توفي رحمة الله عليه والثاني حالته عادية، ولما سوينا لهم تحاليل لقيناهم متعاطين حشيش وشاربين خمر وجلست مع الولد اللي ماجاه شي وسألته عن عمره قال (18) سنة.. وعلى طول جلس يبكي وقال تكفى يا دكتور استر علي انا والله اول مرة اتعاطى مخدرات وخويي هو اللي جابها عندي في بيتنا وشربنا انا واياه وقال خلنا نروح نتمشى.. وصار اللي صار قلتله احمد ربك ان الله عطاك عمر جديد.. وترى خويك يطلبك الحل.."
"لا حول ولا قوة الا بالله ما فيه شك دايما ما نسمع ان المخدرات والخمور لها ارتباط بالحوادث المرورية.. وياليت الشباب يبعدون عن المخدرات ومن هالبلاوي لأن ما وراها الا المشاكل والحوادث والموت. ويالله سترك".
الأبرق