صندوق من عهد الزمن والقديمين يحوي ملابس والجواهر والاعطار

شنطه قديمه جوفها ألوان وأشكال
فيها الذهب واضح يلمع بريقه
وعلى يسارك مقتنى كل رجال
حضارةٍ راحت وباقي وثيقه
فيها تراث وذكريات لها حال
راحوا وخلواها وصارت عريقه
حياتهم فيها من الكد والفال
واليوم كلٍّ عارفٍ وش طريقه
حمد عبدالله الوايلي - حوطة سدير
هذا صندوق العروسه
فيه الذهب والاطياب
أغراضه وسطه مقيوسه
محسوب كله بحساب
شراه المعرس بفلوسه
هذا شرع الله بكتاب
سليمان بن عبدالعزيز السنيدي
شنطةٍ مِنْ ماضي الوقت للزينه
والتاليه للرجل سيفٍ وجنبيه
ومع الذهب أشياء حلوه ثمينه
وما تِفتخر فيه الرجال الابيه
سعود عائش الحربي - جدة
صندوق من عهد الزمن والقديمين
يحوي ملابس والجواهر والاعطار
أيضا هدايا غاليه من كريمين
محفوظةٍ ضمن الهدايا والاسرار
نورة الفاضل - بريدة
نرحب بمشاركاتكم الشِّعرية، وما تلتقطه عدساتكم
من الصور الهادفة والطريفة على إيميل الخزامى:
rb-khozama@alriyadh.com
صورة العدد السابق