ياللي تخضين اللبن في صميله من علّمك يومك صغيره وتدرين

بنتٍ تخض لها حليب المغاتير
جوف الصميل اللي من الجلد مصنوع
عادات من عهدٍ قديمٍ مساتير
وقتٍ مضى ما بين جيران وربوع
حمد عبدالله الوايلي - حوطة سدير
خضي اللبن يا بنت الاجواد خضيه
خلّي المسيّر دوم يذكر فعولك
ياللي السنع من امك انتي ورثتيه
يا حظ والله يالغلا من ينولك
عزّي لحال اللي عَشا ما تسويه
وفي فعلها بالبيت ما هي بحولك
خالد بن ناصر المخيمر - روضة سدير
ياللي تخضين اللبن في صميله
من علّمك يومك صغيره وتدرين
هذاك جيل وجيلنا اليوم جيله
واليوم جانا في العلب شكلها زين
حتى الزبادي والسمن جا بديله
والا دخلنا السوق شفناه بالعين
سليمان بن عبدالعزيز السنيدي - الرياض
عاداتنا يا زينها بنت الأجواد
طفلة صغيرة لكن إلها تحيّات
تعمل لجل تحقيق آمال.. ومراد
في كل صبح وعصر في كل الأوقات
نورة الفاضل - بريدة
نرحب بمشاركاتكم الشِّعرية، وما تلتقطه عدساتكم
من الصور الهادفة والطريفة على إيميل الخزامى:
rb-khozama@alriyadh.com
صورة العدد السابق