من الخشب ينحت المنجور يصنع لنا اشكال جذّابه

فيما مضى من شغل الايدي يعيشون
إما خرازة جلد والّا نجارة
أهل الحِرف في السوق صاروا يشافون
للي نسينا من حِرفنا إشارة
شف حرفة النجار وشلون بالهون
ينقر ويوجد آنيةْ بالمهارة
عودوا لها في بعض الاوقات تكفون
ترى العمل فيها بدايةْ تجارة
محمد مقحم المقحم - الرياض
صنعة لها تاريخ في مجد الأجداد
يصنعها اللي عنده اسلوب وافكار
ينجر اواني قديمه لها لون واعداد
راحت مع اللي روحوا باقي اخبار
اخبار وسط المعارض لها امجاد
ويحيونها ناس عقب وقت الأبرار
حمد عبدالله الوايلي - حوطة سدير
من الخشب ينحت المنجور
يصنع لنا اشكال جذّابه
زيّن صواني ومعها نجور
ومن شافها ناله اعجابه
في مهنته مبدع ومشهور
من دون ما ينشر سنابه
سليمان عبدالعزيز السنيدي - الرياض
هذا تراث ماضيٍ له أصاله
حرفه قديمة تغني الرجل عن ناس
إبداع من فنٍ ونقشٍ جماله
معلّمٍ يعمل على وزن وقياس
سالم الدوسري - الرياض
نرحب بمشاركاتكم الشِّعرية، وما تلتقطه عدساتكم
من الصور الهادفة والطريفة على إيميل الخزامى:
rb-khozama@alriyadh.com
صورة العدد