هذا السدو زاهي الألوان يرسم بلوحات فنيه

هذا السّدو يا اللي تمنّون شوفه
وش لون يصنع؟ من حِرفنا العديده
فيه النقوش اللي تزيّن وصوفه
يعيش من هذا السدو صنعة يْده
فخرٍ لنا والشِّعر نكتب حروفه
تسجيل لإنجاز المواهب نريده
محمد مقحم المقحم - الرياض
بنت الحلال اللي على السَّدو تنطاه
ما تنتجه بالبيت والبيع مرغوب
أجمل الساحات بالسدو تلقاه
تناسق ألوان ومتانه بلا عيوب
تراث جدَّاتٍ على الكل يرعاه
دامه لهن من ماضي الوقت منسوب
سعود عائش الحربي - جدة
فن الحياكه له مع الوقت تذكار
قفت به الايام هي والسنيني
ياما حلا في بيت الشَّعر شبة النار
ادلال مصفوفه ونجرٍ رنيني
وسوالف رجال مناعير شعار
وراعي الربابه من الوله له ونيني
تعيش جوك لو عليك الدهر جار
يسر عينك شوف الزمل والقطيني
خالد بن ناصر المخيمر - روضة سدير
هذا السدو زاهي الألوان
يرسم بلوحات فنيه
تاريخ ماضي وله عنوان
قبل مية عام هجريه
وأصبح لنا رمز للأزمان
في مملكتنا السعوديه
سليمان بن عبدالعزيز السنيدي - الرياض
نرحب بمشاركاتكم الشِّعرية،
وما تلتقطه عدساتكم من الصور الهادفة
والطريفة على إيميل الخزامى:
rb-khozama@alriyadh.com
صورة العدد السابق