الله على شوف السحاب المراويح اللي بروقه فوق نجد العذيّه

كان بيت الأسبوع الماضي للشاعر محمد مرزوق السميري والذي يقول:
الله على شوف السحاب المراويح
اللي بروقه فوق نجد العذيّه
وهذا صدى البيت من الشعراء:
الحمد للي للرعد فيه تسبيح
رب كريم وخالق للبريه
احيا البلاد وصار للجو تنفيح
زانت على هل المطر جرهديه
وتبي تزين الارض لاهل المساريح
شوف الخضار وكل فيضه مليه
ونشوف نظمات الحباري مدابيح
وجراح بكفوفه ملاطخ دميه
الا شهر جراح عاف الملاويح
طلعه بعيد مايحلا حليه
خالد إبراهيم المرشود - الرياض
من فضل من يجري سحابه مع الريح
الارض رويت بين صبح وعشيه
سحب باثر سحب غدا للمطر سيح
ويفصل سحابه ديمة وبرديه
سالت بها الوديان رحمه وتفريح
والكل كنه حايز له هديه
علي مونس الجدي - الرياض
سحب تتالا سيلها يعقب الريح
حتى تعم الارض صبح و عشيه
بعده نشوف البيد شعبانها اتسيح
من فضل ربي صارت اكبر هديه
علي الرشيد - رياض الخبراء
لعل برقٍ ناض بسحبٍ مراويح
يِسْقيك يانجد العزيزه عليه
سِج القدم هاليوم ورَبعٍ مِفاليح
بدوٍّ جميلٍ دامت الروح حَيَّه
ويالله يا مِن لِه خالصات التسابيح
الخير والغفران مِعْ زين نيه
سعود عائش الحربي- جده
ينشي من القبله بكور سراويح
سحاب عريض عجل ونيه
يمطر خياله في بروقه لواويح
يحن رعاده رياحه هديه
يسقي ديار في مداها مشاويح
يعلها الودان صبح ومسيه
عم الفرح بين دوج وسواويح
نبته خضار والمناظر كسيه
طبيعة سرت قلوب المفاليح
رب كريم وكل خيره عطيه
من امس كنامجذبين مجاريح
اليوم بهجه و نفس رضيه
حمد عبدالله الوايلي - حوطة سدير
ياالله تسقي منبت الفل والشيح
و ارى فروع الدوح منّه نديه
و اشوف راع الباديه مستريح
مرتاح باله يوم ترعى الرعيه
و المح لبراق العشيه لميح
و انظر الى نبت الفلا باريحيه
محمد عبدالله الشهري - مكة المكرمة
بيت الأسبوع
كتبه الشاعر: علي برجس المصقر من الرياض ويقول:
عطلة مدارس مقبله والطقس زين
يعطينا ربي خيرها عالم الغيب
نستقبل صدى البيت المطروح خلال ثلاثة أيام
من نشر البيت المطروح على إيميل الصفحة:
rb-khozama@alriyadh.com