الوسم داخل له ثلاثين ليلة يارب ترحم يابس الأرض بأمطار

كتب بيت الأسبوع الماضي الشاعر: عبدالله بن عايد المفضلي من حايل ويقول:
الوسم داخل له ثلاثين ليله
يارب ترحم يابس الارض بامطار
عزك يابرق شلع نستخيله
على النفود ومنحدر يم سنار
عساه يسقي دارنا عل سيله
وتصبح مفالي جل الاذواد نوار
ويعم كل المملكه في هميله
وكل بداره تختلط فيه الاشجار
عبدالله مطير الحمدان - حايل
يالله يا راع الفضال الجزيله
باخبار غيث الوسم تزداد الأخبار
وبالغيث تحيا الارض او نرتجيله
ويعم كل انحاء الوطن بر وديار
سعود عائش الحربي - جدة
الحمد لله عد بارق مخيله
حمدا كثيرا ياملا سر وجهار
اغاثنا بعد المحل بالجزيله
ونرجي يعم الخير في كل الاقطار
سلمى تجاوب باللحون الرعيله
تلعب طرب يوم استعلت بالامطار
حاتم عبدالله الغريري - الشنان
يالله يامعطي العطايا الجزيله
يامحيي ارض يبست فيها الاشجار
يالله بنو كل حي يخيله
يصقع رعدها برقها مثل الانوار
يسقي ديار عقب ماهي محيله
ويكسي شهاب القاع من كل نوار
رجا عادي بن رمال الشمري - الرياض
يا الله في نوٍ ترى العين سيله
يعممه ربي على كُل لقطار
و انضرالى أغصان الشجر فيه ميله
من الروى يوم انها جات لمطار
يا سعد من في ظلها حط قيله
يشوف من حوله نباتات و ازهار
يرافقه دلّه و بنّه و هيله
يسهر في القمرآ الى وقت لسحار
محمد عبدالله الشهري - مكة المكرمة
وتنزل لنا خير كثير بكيله
وتشوف برق تلامع فيه لاحار
ثم تهامل وانتثر ماه وسيله
ويالله ياعالم غيب الأسرار
تعم دار المملكه من مخيله
تروي جميع ديارها دون اضرار
وعشبه يجي طايل على ميله
طرف عدت الكشته للاسفار
حمد عبدالله الوايلي - حوطة سدير
يالله عسى هالوسم يقفاه سيله
سيل(ن) رفوق ما تجي منه الاخطار
وتنقل لنا الارصاد صوره جميله
في صفحة خزامى تزينها الازهار
والعشب ينبت فوق عالي النثيله
ونقرا من الصفحه جميلات الاشعار
سليمان بن عبدالعزيز السنيدي - الرياض
بيت الأسبوع
كتبه للصفحة الشاعر غالب ظاهر الجنيدي من رفحاء ويقول:
بدت تعود الارض وتعود الاشجار
وفي كل محميه غطاء نباتي
نستقبل صدى البيت المطروح خلال ثلاثة أيام
من نشر البيت المطروح
على إيميل الصفحة:
rb-khozama@alriyadh.com