يا ناس ياللي تفهمون المعاني الجار له حق عظيم على الجار

كتب بيت الأسوع الماضي الشاعر حمد عبدالله الوايلي
من حوطة سدير والذي يقول:
يا ناس ياللي تفهمون المعاني
الجار له حق عظيم على الجار
وقد كان صدى البيت من الشعراء:
الجار له تقدير دايم وشاني
وعن شوف غراته يغضن الأنظار
وصى عليه المصطفى بالبياني
على احترامه دوم في سر واجهار
تدمح له الزله ويجزا الحساني
حتى يبدل داره الجار بديار
هاذي حقوقه من قديم الزماني
ومن نقص حقوقه يبي يلاقي النار
سعود ثواب سليم المطيري
ياهل السلوم الطيبه والعواني
الجار له حق على كل من سار
وصى عليه المصطفى باللساني
وصيِة للجار إلى سابع الدار
حَدث وقال اللي يريد الحساني
عليه إكرام الجار ويكفيٍه الاشرار
وقصيدة النجدي لها كل شاني
شيخة قصيد الجار مشهورة اذكار
مشعل بن صنت العصيمي - الخرج
صدقت يا راع الشعر والمعاني
ونشكرك ياللي جبت بيتك والاشعار
الجار راع الدار بامن وأماني
بالك عليه تعيل يا نسل الأحرار
وان عال فاصبر والله المستعاني
توجر ولو انك تجرعت الأمرار
علي مونس الجدي - الرياض
البيت يا بن الوايلي له مكاني
في قلب ذا مسلم بكُل الديار
الجار قبل الدار فيها معاني
يدلها الطيّب بدون انكار
لو غاب يوم انشد عنه يوم ثاني
فالجار ياهل الدين يحسب على الجار
محمد عبدالله الشهري - مكة المكرمة
اي والله ان الجار نور المكاني
الجار وصى به نبيك ولو جار
ليّن له الجانب لياجاك عاني
واعطه حقوقه لا تعذر بالاعذار
من شان لامنه سكن بيت ثاني
يذكر مواقيفك معه سر وجهار
عبدالله بن عايد المفضلي - الرياض
أوصى به اللي أوتي سبع المثاني
وأوتيَ من القرآن به خير الأذكار
قال انتبه للجار يا المودماني
من جاع جاره ما حِسب ضمن الابرار
المسلم لْجاره كثير الحساني
وان شاف من جاره أذى صار صبّار
وان جيت لامثال العرب من زماني
الجار قالوا: يرحل وينقل اخبار
محمد مقحم المقحم - الرياض
الجار حقه من قديم الزماني
حتى النبي وصى بهديه على الجار
هذا الترابط من خصال المعاني
حتى ولو يبعد مسافه ورا جدار
وداوم على وصله ونقل التهاني
وخل الفرح يضفي على نقل الاخبار
سليمان بن عبدالعزيز السنيدي
بيت الاسبوع
كتب بيت الأسبوع الشاعر علي برجس المصقر من الرياض ويقول:
المترو اللي نجاحه زين
فك الزحام وتريحنا
نستقبل صدى البيت المطروح
خلال ثلاثة أيام من نشر البيت المطروح
على إيميل الصفحة:
rb-khozama@alriyadh.com