أغنام بالموتر مَعَ طفْلٍ صغير آخِرْ لقَا والعلْم عنْد اللي خلَق

لا تتركون الطفل عند المواشي
لا ينطحنه والنتيجه ندامه
أبوه لاهي لكن الطفل عاشي
وحرصه ترى مطلوب قبل الملامه
هذي رساله للنشامى بلاشي
واللي يطيع العلم منا احترامه
محمد عبدالعزيز الخنيفر - أشيقر
يا ليتنا نعرِفْ بما يخفي المصير
إنْ كانِ ريّحْنا النّفوسِ مْنِ القلَق
أحْدٍ كسَبْ حِلْمهْ بعَدْ أمْرِ القدير
وأحْدٍ بقَى حلْمهْ كما حبْرِ بْوَرَق
أحْدٍ منِ الدِّنْيا قنَعْ لو هو فقير
وأحدِ يطاردها إلى آخرْ رمَق
أغنام بالموتر مَعَ طفْلٍ صغير
آخِرْ لقَا والعلْم عنْد اللي خلَق
ناصر جمعان آل عوض - وادي الدواسر
ضحية أبوه بالونيت مربوطه
فرحان فيها بإذن الله مقبوله
ذي عادةٍ مِن سنن بالدين محطوطه
يا زين زرع الفضايل بالطفوله
ولها بنهج النبي صفات مشروطه
ولو سعرها زاد لجل الأجر محموله
تنعاد يا عيد والأحوال مبسوطه
وديرة نبي الهدى بالخير مشموله
سعود عائش الحربي - جدة
على ظهر الونيت مع الحلال وكلهم راضين
تعايش ورضى باللي يصير في الواقع المألوف
حياة قديمه عليها ربوع الخير وهم غالين
وسنين مضت لها على وجه الزمان ظروف
وتدور الليالي عليهم ولكن ذكرهم باقين
تدابير الولي فيهم تخلد ظاهره بحروف
تعطر ذكرياهم بالموده باقيه مع التالين
عساهم جنة الفردوس وباقي منهم السالين
حمد عبدالله الوايلي - حوطة سدير
صوره قديمة لها سنين.. وسنين
قفّت بها الأيام والعمر فاني
يوم الولف بين الغنم.. والوراعين
بالعطف والرحمه وزود الحناني
في وسط صندوق العراوي سعيدين
متوجهين البر زين المكاني
من شاف شكلك قال يا حيّ ذالعين
رمز الفخر لأجيالنا هالزماني
خالد ناصر المخيمر - روضة سدير
في الحوض عنز وشاة والثالث وليد
كنّه يطالع في الزباين بيشرون
في ددسنٍ نص العمر راح فالبيد
حمولته طن من الشيل أو دون
جلب الغنم يكثر ذا الأيام في العيد
خص الضحايا يكثر اللي يبيعون
سعود عبدالعزيز الهزاع - نعام
الطفل عند البهم لا تتركونه
في نطحته يا ناس يا هي خطيره
هذا بهيمه ما خفا تعرفونه
وثّق رباطه دايمٍ بالحظيره
ريان بن محمد الخنيفر
يا صغيّر السن ما فيك حيله
تكبر وتسعد في طويل الزماني
تخدم أبوك بكل جهد.. ووسيله
وترافقه في كل وقت.. ومكاني
سطام المسردي - الرياض
نرحب بمشاركاتكم الشِّعرية، وما تلتقطه عدساتكم من الصور الهادفة والطريفة
على إيميل الخزامى:
rb-khozama@alriyadh.com
صورة العدد