طيرٍ يدَوّر مُويِةٍ بالمواسير عطشان وعْروقه من الحرّ يِبّاس

سلّم على اللي صور لنا الحمامه
كنّه يوصينا على سقية الطير
هذا حديث المصطفى في كلامه
يقول سقيا الما ترى كلها خير
قبل الشهر يا ناس يكمل تمامه
أجرٍ مضاعف لا يجي فيه تقصير
نصير في موقف بيوم القيامه
لحسابنا ميزان لو كان قطمير
سليمان عبدالعزيز السنيدي - الرياض
طيرٍ يدَوّر مُويِةٍ بالمواسير
عطشان وعْروقه من الحرّ يِبّاس
يا حظّ من يسْقيه بشّره بالخير
يكسب كثير الأجر من خالق الناس
الأجر فِ الإنسان والزرْع والطير
وِبْكلّ مخلوقٍ جرت فيه أنفاس
حرمه أغاثت كلب وأسقته من بير
نالت رضا من يذهب الهمّ والبأس
لا تحقر المعروف لو وزن قطمير
ولا تْكونِ للأموال خادم وحرّاس
ناصر جمعان آل عوض - وادي الدواسر
الدينمو فيه المواصير مشبوكه
الي تشيل الماء والأخرى توزًع
الماء يندي والحنفيات مفكوكه
والطير ماحلا وقعته يوم هزًع
عين تراقب وعين تسبر شكوكه
حداه حادي في ضماه يتجزًع
حمام ياللي تغير طبع وسلوكه
في أول الوقت ماتالف ومتفزًع
واليوم ما ذيرك لابيت وحروكه
دنيا تقلب على الأجواد وتمزًع
حمد عبدالله الوايلي - حوطة سدير
الله يجزي راعي البير بالخير
اللي يقدّم خير وإحسان مشكور
الأجر وارد بالحيوان والطير
كلٍ يحب الخير بالبر والدور
شف الحمامه تشرب الميّ وتطير
وتكمل المشوار والقلب مسرور
علي رشيد الرشيد - رياض الخبراء
توّه بدا هالصيف حر ولواهيب
والشوف ما غيره سراب وجفافي
يجازي ربي من يقدم من الطيب
لمنهو يبل الكبد فالدين كافي
سقيى العطاشى من قراح المشاريب
وضحت من الصورة طير لهافي
جمال صالح الحنيني - القصيم
ياللي تريد الخير لا تترك الطير
الماء ترى مطلب ولا تهملونه
تكفون همّوا يالنشاما هل الخير
وضع الإناء مطلوب لا تتركونه
هذا هو الواجب ولا يصير تقصير
هذي طيورٍ واجبٍ ترحمونه
محمد عبدالعزيز الخنيفر - أشيقر
لاحد يلوم الطير والقيض حاديه
طيرٍ لفى من بعد هالك وضميان
يشرب وهو مرتاح شوفوا مواطيه
وإليا تروّى طار ماكن عشطان
شلع وروّح متجه صوب أراضيه
قبل يجيه الليل روح امسيان
كم طير حر بيناتٍ مواريه
طير السعد يعجبك لاصار شيهان
خليف فهيد الحربي - الزياض
‫شف الحمامه موقعه فوق ماطور
من الضما تشرب تساريب منه
اسقوا حمام من الضما داخل السور
حاديه قيض من لواهيب كنه
في كل كبد رطبة انت ماجور
ماخوذ من المصحف ومنقول سنه
سعود عبدالعزيز الهزاع - نعام
رص الظما والقيض قمري على أقصاه
ولا لقا المطلوب بين المواصير
قل المطر والطير رصه ظماه
الله يعيضه في سحابٍ مزابير
يا طير أكفخ ما بقا كود ما ذاه
أسلاك كهرب مع نشوفة مواصير
وليا مكانٍ بالوطا شحّ في ماه
أكفخ وتلقى عند ربك تياسير
سعود عائش الحربي - جدة
طير الحمام واقفٍ فوق صنبور
يبي يبل الريق من جور مابه
وياللي عليه من العطش صار معذور
الوقت حامي زايد الحر جابه
ما فكر بصياد ولا صوت ما طور
زود العطش نسّاه مكمن صوابه
خالد ناصر المخيمر - روضة سدير
الصيف جانا به شديد الحراره
اسقوا البهايم والحذر تهملوها
الحرّ يا ربعي يعرف الإشاره
في كل وقتٍ واجبٍ تسعفوها
والكل منكم ما خفانا شعاره
يافاعلين الخير لا تتركوها
ريان محمد الخنيفر
نرحب بمشاركاتكم الشعرية وما تلتقطه عدساتكم من الصور الهادفة والطريفة على إيميل الخزامى:
rb-khozama@alriyadh.com
ويا هلا..
صورة العدد السابق
Your browser does not support the video tag.