لبسٍ على الزّهرات ألوان وأشكال وألعاب تعجب رغم كل الجديدات

سعادةٍ فينا .. ويا كانت أيام
نلعب بفريره وصوتٍ مزيدي
خفة يدينا كننا وسط الأنغام
فيها من المتعه ونرجع نعيدي
اليوم بدل حالنا مثل الأوهام
مسك الجهاز بساعةٍ ما تفيدي
جمال صالح الحنيني - القصيم
نجّار يصنع للبنيات وشّاش
ويلبس ايديهن بالأكمام منقوش
ألعاب معروفة لمن قبلنا عاش
من عادة الأطفال بالسوق والحوش
قلوبهم زينة ولا تعرف اهواش
لعبٍ بلاش وماحدٍ يدفع قروش
علي رشيد الرشيد - رياض الخبراء
يا جد لك تاريخ ماضي ولك صوت
بين البنات اللي لهن لبس زاهي
ويا زين لبس الشالكي كنه بشوت
على ثلاث اللبس كاسي وراهي
تعلمنْ من شايب الخير فاسكوت
اصل التراث اللي له الوقت باهي
يا وقت.. يا وقت الزمن فايتٍ فوت
ذكرى تعود اليوم والكل لاهي
حمد عبدالله الوايلي - حوطة سدير
يا بناتي قصتي سيره مثيره
قصةٍ فيها أنا لْنفسي ظلوم
كانت أحلامي وآمالي كبيره
في حياةٍ كنت أحْسبها تدوم
كان حلمي قصر وأموالٍ وفيره
وأتزوج وانجب أولادٍ قروم
والسفر من ديرةٍ حلوه لديره
والهنا يزداد يومٍ بعد يوم
ماهقيت العمر أيامه قصيره
والمنايا طيرها دايم يحوم
يا شقى من يجمع ويكنز لغيره
أشهد إنه من سعادتهِ مْحَرُوم
يا ورود الروح يا شْموسٍ منيره
الْعَبِن من قبل تلفيكن هموم
ناصر جمعان آل عوض - وادي الدواسر
صورةٍ تحكي عن الماضي الجميل
والصغار اليوم فرحه .. وابتسام
وجلسةٍ مع جدهم ماله مثيل
ذا وفا الاحفاد .. وللغالي مقام
ذا تراث أجدادنا مثله قليل
وناشره يسلم وله منّي سلام
محمد عبدالعزيز الخنيفر - أشيقر
صورة جميلة ملفته عبر الاجيال
لبسٍ حلا وألعاب من ماضيٍ فات
لبسٍ على الزّهرات ألوان وأشكال
وألعاب تعجب رغم كل الجديدات
ثلاث زهراتٍ لهن جدّهن قال
أنا فخور بلبس زين الصغيرات
من يفتخر ماضيه باقي ولا زال
أجيال بعد أجيال حتى النهايات
تاريخنا سامي بطولات وأفعال
أمّه لها في طيْب الأفعال بصمات
سعود عائش الحربي - جدة
يا جد ياللي بين الاحفاد مرتاح
مبسوط تضحك رغم مرّ السنيني
يذكرنك وقتك ماضي وقد وراح
يوم الشباب .. اليوم ربّي يعني
وبناتك اللي لابسه زين.. ووشاح
هامه وثوب مطرّزٍ شغل بحريني
عيني عليهن بارده والشَّعر طاح
في وصفهن بيت الشِّعر له حنيني
خالد ناصر المخيمر - روضة سدير
نرحب بمشاركاتكم الشعرية وما تلتقطه عدساتكم من الصور الهادفة والطريفة على إيميل الخزامى:
rb-khozama@alriyadh.com
ويا هلا..
صورة العدد السابق
Your browser does not support the video tag.