صوت الصورة

يالله يا ربِّ البشر مدِّنا بعون
وأحسن إلهي لا دَنَتْ خاتمتنا
ما دامت الدنيا سوى لخالق الكون
حنَّا بْنُروح وناس تأتي بعدنا
صورة خزامى هيضت شوق وشجون
دِرِّيفِةٍ ياما بها قد لعبنا
الناس في الماضي طبيعي يْتَسلّون
رغم البساطه كم لعب أسعدتنا
ناصر جمعان آل عوض - وادي الدواسر
هذي ملاهي نادره ذيك الأزمان
وقتٍ مضى يا زينها ما نسيناه
مع القرابة والرفاقة والأخوان
يا زين ماضينا ويا زين ذكراه
واليوم شوفوا ألعابنا بكل ميدان
في كل حي موفرٍ دوم نلقاه
محمد عبدالعزيز الخنيفر- أشيقر
لا بغيت الجد فكر في الزماني
لا كلافه في مجاله تذكرونه
البساطه فيه تحقيق الاماني
والتسالي من خشبهم يجلبونه
عبروها يا زميلي في هواني
والزمان الشين لابين سنونه
يعتم اللون الجميل الارجواني
والحظيظ اللي سليمٍ من طعونه
حمد عبدالله الوايلي - حوطة سدير
زمان أول ترى ما راح
ويا حظ من حافظ على دينه
مرجيحتي في ساحة المصباح
وفراشنا خوص يا زينه
حتى الخشب جابه الفلاح
وحبالنا من ليفه .. ولينه
عبد العزيز الصالح - القصب
لعبه قديمه من زمان الجدودي
ذاك الزمن ألعاب هذي ملاهيه
من حازها كنه تعدا الحدودي
وطاف الديار وعاف ضلعه وواديه
يلعب عليه عقال والثوب مودي
مبسوط يضحك ما يجاوب مناديه
عاف الغدا ويّا العشا عند عودي
يلعب نهار .. وليل ما حدٍ يباريه
عبدالكريم النغيمشي - لوذة
مرجح على كيفك وطرّب حياتك
العب إلين النفس تشكي تعبها
حقك خذه والا ترى الوقت فاتك
مرجيحةٍ مشكور منهو نصبها
جواً عليل وفرصةٍ يوم جاتك
رياضةٍ حلوة وكلٍ لعبها
صورة بحق اتعيد لك ذكرياتك
أيام راحت عذبةٍ من حسبها
عثمان إبراهيم الرشيد - الرياض
مرجيحه من الخشب بحبال مربوطه
مع واقع الارض تذكر شايب اوقاته
كرسيها الليف ملفوفٍ له بفوطه
واللي تحتها من العسبان حصراته
ألعابهم من قديم الوقت مزبوطه
قبل المراجيح ما توجد صناعاته
سعود عبدالعزيز الهزاع - نعام
الله أكبر الزمن صار دوار
راح الزمان اللي به القلب لاهي
اللوح بالحبلين مربوط بالدار
مرجيحةٍ بالبيت واللوح راهي
تبدّلت أيامنا صار .. ما صار
مسطحاتٍ زاد فيها التباهي
ألعاب مختلفة كثيرات الأخطار
وأطفالنا تفرح بشوف الملاهي
خالد ناصر المخيمر - روضة سدير
بالهون بالهون يا الغالي
الحبل لو ينقطع طاح
مرجيحتك شكلها بالي
ليتك اتحوّل.. وترتاح
يا زين لبستك بعقالي
لبس السعاده والأفراح
عبدالكريم عبدالرحمن السلّوم - القرائن
في ما مضى شفنا الملاعب قليله
نلعب على التربات بأرضٍ شديده
واليوم مزروعه .. ولا به مثيله
في كل موقع جعل ربي يزيده
وكثرت حدايقنا هواها عليله
في كل حي تحصّل اللي تريده
ريان محمد الخنيفر
نرحب بمشاركاتكم الشعرية وما تلتقطه عدساتكم من الصور الهادفة والطريفة على إيميل الخزامى:
rb-khozama@alriyadh.com
أو الفاكس رقم: 0114871070
ويا هلا..
صورة العدد السابق