صوت الصورة

نسمع بتدريس الكتاتيب من ناس
نالت صدارة علم بقل الثقافه
والحرف يكتب بالفحم دون كراس
ومن لا حفظ يضرب بليا مرافه
سعود بن عبدالعزيز الهزاع - نعام
يا معلم الطلاب بالهون بالهون
ولا زمان الضرب .. ولا زمانه
مشهد تراث الصوره اللي تشوفون
العلم .. والتعليم عالي مكانه
عبدالمحسن بن محمد المحيسن
وقت الفلكه راح ياليته اليوم
تخلي الطالب يراجع دروسه
واليوم وسط الفصل في عيونه النوم
تلقا الحقيبه والدروس محبوسه
شبيب بن حمود القحطاني - المزاحمية
كود عليه ان كان مخطي وغلطن
ترى الأدب فضلٍ على العلم يا ناس
كم واحداً بأولاده اليوم بلشان
من شرهم جابوا له أوجاع بالراس
خالد بن ناصر المخيمر - روضة سدير
العلم نوراً ما خض الكل معروف
ياما يسر القلب يا سعد راعيه
فضله عظيم ولا جله الكل مشغوف
واللي به الاهمال يلقى جوازيه
محمد بن عبدالعزيز الخنيفر - أشيقر
يا مر عليه وطولت ما عمل شي
وهذا جيزا اللي ما ينفذ لو امر
امريح و مرتاح ويتابع الفي
ولعمال كنها من جهوده عوامر
غنام مسعود القريني - نعام
من غاب والا نسي الواجب
هذا عقابه من الماضي
واليوم لا زال يا طالب
في حكم الاستاذ والقاضي
علي آل زولان الفيفي - بيشة
الطالب اللي ما يحفظ دروسه
ودك تكسر بالعصا رجلينه
حتى يحفظ الدرس مثل فلوسه
وليا نشدته جاوبك من حينه
مطحس الحميدي المقاطي
صورة العدد تصوير القارئ تركي العنزي
صورةٍ في الخزامى ذكرتني الدراسه
من ترك واجبه والا ارتكب له خطيه
ماله الا الفيلكه تنكسه فوق راسه
ثم يدب ويستأدب بهذا خويه
مشاري الغنام - ثادق
يا ونتي ونت المفلوك
رجليه بالعود مربوطه
لا منطلق لا هوب مفكوك
وياكل اكلةٍ مضبوطه
عبدالكريم عبدالرحمن السلوم - القرائن
أشوف لي مسكين مربوط الأقدام
مدري طريقة علم وإلا خرافه
فيما مضى ما فيه تصوير .. وإعلام
مافيه إنترنت .. مابه صحافه
عبدالله سعيد الخالدي العنزي
هذا هو التعليم وقت الكتاتيب
يمْعارضين الضرب بالله شوفوه
لا ما يضر الضرب لا صار تأديب
للموذي بفِعلِه والأخلاق خلّوه
فهد بن عقيل الطويان - بريدة
يا مطوع اسمحلي على كل تقصير
ترى العصا في باطن الرجل علّه
باكر أدبر كروتك دون تأخير
واليوم الآخَر حافظ الجزو كله
سعد الحمّاد – روضة سدير
تعليمنا اول مشكله مسكين طالب لوعصا
مهما توسّل او بكى الجلد ما عنّه مناص
رغم الظروف القاسيه ما يرحمه ضرب العصا
جور المقري لا سطا ما ينفعه تكفى خلاص
عبدالكريم إبراهيم بن خزيّم
هذا زمان أول حقيقه وموجود
يوم المعلم ساطيٍ كنه جلاد
والطالب المسكين طايح ومجلود
اليوم تلقى اغلب الصف بلاد
حمد عبدا لله الوايلي - حوطة سدير
الفلكه مع العصا ماضي فات
مع قساوتها يعز المعلم
فيما مضى بعضه يزينن الابيات
وبعضه ليا دققت تزعل وتتألم
سعود عائش الحربي
من أولٍ الضرب عادي ومسموح
والطالب إن جا ما حفظ يضربونه
واليوم راحت كلها لعب ومزوح
ولو المعدل نازلٍ يرفعونه
سعد الجبيري - القويعية
طلابنا شوفوا عساكم تعذرون
كيف الدراسه كانت وقت الكسافات
جلد وعقاب وطول يومه يصومون
وايضا الطريق يمترونه مسافات
عبدالكريم النغيمشي - الربيعية
الحمد لله ماني طالب
في مدرستكم تطقونه
ما ترحموا وجهي الشاحب
يرقب مربيه بعيونه
عبد المحسن بن محمد الجريسي - الرياض
نستقبل مشاركاتكم على إيميل الخزامى:
rb-khozama@alriyadh.com
أو الفاكس رقم: 4871070 زاوية (صوت الصورة)
ونرحب بالصور الهادفة والطريفة .. ويا هلا