صوت الصورة

راكب على الدباب ويذاكر الدرس
طالب نجيب ومجتهد بالدروسي
الوقت ضيّق والتعب مارسه مرس
ما نام طول الليل يقرأ يحوسي
وهذا الكتاب اللي معه يفرسه فرس
والمشكله ما جاب رقم الجلوسي
عقلا خزن العنزي - تبوك
الطفل يذاكر على الدباب
وأخوه ماسك دركسونه
خايف على خوه لا ينصاب
مقلوب وجهه تشوفونه
الله يستر على الأحباب
بالدرب لو غمض عيونه
عبد الله علي الحوشاني – الرياض
راكبٍ على الدباب والوضع معكوس
والطفل لاهي يشتغل بالقرايطس
معه القلم يرسم شخاميط ويحوس
يا الله عسى ما شغلنه كوابيس
علي رشيد الريشد – رياض الخبراء
يا راعي الدباب أرفق على الهون
أحفظ رديفك لا تجيب المصيبه
تراه لاهي منشغل يكتب النون
حتى ركوبه فيه فكره عجيبه
حمد عبدالله الوايلي - حوطة سدير
على الدباب يكتب واجبه هذا الخطر يا ناس
أقول أن الفعل مرفوض واللي فاعله غلطان
تخاطر لأجل صوره وانتبه يا فاقد الإحساس
توقف لا يجي مكروه وفكّر وألعن الشيطان
محمد بن عبدالعزيز الخنيفر - أشيقر
طفلٍ تذكر واجبه والتفت له
في وضع كايد والقلم منه ما طاح
وحنّا ولدنا من سجله نختله
وليّا كتب حرفين من واجبه صاح
سعد الحماد - روضة سدير
أظن هذا مصطفى اللي يقولون
ربوعنا خلوه بالواتس نيشان
وعلى طريق المدرسة يكتب بهون
واجب نسيه وصار يكتب وبلشان
عبدالكريم الراشد التميمي - الغزالة
حلو الظنا لا تفرّط فيه
فلذه من الكبد ما احلاها
والدفتر اللي كتب فيه
له طلبةٍ لو تمناها
عبدالكريم عبدالرحمن السلوم، القرائن
رجلٍ على ظهر دبابه
للمدرسه طفله موديه
الطفل يكتب على كتابه
يا الله من الخطر تاقيه
سعود عائش الحربي
أولادنا خوذوا من الناس عبره
شوفوا طريقتهم وهذي حقيقه
ذا مصطفى تكا على ظهر غيره
ما ضيّع المشوار لو هو دقيقه
عبدالكريم النغيمشي - الربيعية
راكبٍ من فوق دباب الهنود
سايقه هندي ومردف له بزر
متجه للسوق والممشى سنود
عز حال اللي معيشته بعزر
محمد بن فهد الجلعود - سميراء
الطفل ذا ما ضنتي مفوتن شي
لو قالوا اصبر راجع الصبح عيا
ما هو كسول يقول من حضي السي
يبي النجاح وبالمعالي حريا
غنام مسعود القريني - نعام
صورة العدد
نستقبل مشاركاتكم على إيميل الخزامى :
rb-khozama@alriyadh.com
أو الفاكس رقم: 4871070
ونرحب بما تلتقطه عدساتكم
من الصور النادرة والطريفة