صوت الصورة

كانك تبي تفلح وتنجح مع الناس
أختر مكانٍ صح وقت المذاكر
ترى السرير يجيب لك نوم.. ونعاس
وعليك راح الوقت منته بفاكر
سلطان سعد السهلي - المجمعة
النوم خيّم والكتب ما لها دور
كثر السهر فيه المشاكل.. والاخطار
اللي يذاكر بأول الوقت مسرور
يرتاح باللجنة.. وينجح بالأفكار
علي رشيد الرشيد - رياض الخبراء
هذا ولدنا لا رتوشٍ ولا طمس
ودّك تعلق صورته وسط برواز
غفوه قصيره عقب ما يحفظ الدرس
علّ النتايج في الشهادات ممتاز
سعد الحماد - روضة سدير
خذ راحتك ما به صعوبات تعليم
إحضر وتنجح دامها بالمهارات
عن اختبارك به مهاره.. وتقويم
وامعلمك عجلان لجل الاجازات
أهل الكسل خصيت من غير تعميم
للمخلصين أزكى السلام وتحيات
فهد بن عقيل الطويان - بريدة
من يطلب الأمجاد يبذل لها أسباب
ما نال عزاً من قضى عمره سبات
يا الطالب النايم ترى حولك كتاب
قم ذاكر دروسك كفاك الذي فات
عن ساعدك شمّر.. ولا تصير لعاب
حنّا بها الأيام وقت اختبارات
ناصر بن جمعان آل عوض - وادي الدواسر
النفس لازم تبي ترتاح
والفكر لازم يجي صافي
وقت المذاكر زمانه راح
اليوم بيري وسنكافي
عبدالكريم عبدالرحمن السلّوم - القرائن
كبّر وساده بعد ذاكرت الادراس
والنوم سلطانٍ إلى حل وقته
الله يوفق لين دقات الاجراس
واليا قريته احفظه لا فهمته
حمد عبدالله الوايلي - حوطة سدير
طالبٍ وكرّاسه بجنبه
وبالدرس يامل في علاماتٍ كبيره
ومن اجتهد في مقصده وخاف ربه
ورتب منامه والمذاكر بالبصيره
سعود عائش الحربي - القاهرة
ذكرتني بيتٍ ولا عرف راعيه
يا صاحب الصورة كلامٍ وكادي
خلّوه يرقد والليالي تصحيه
يقوم من نومه بليا منادي
شبيب بن هذال آل وندان – الرياض
يا ولد يا نايمٍ بعد الدراسه
ما حلا نومك صباح في النهاري
السهر يقضي على كل الوناسه
لا يغرّك من قضى ليله سماري
ضاعت علومه وراسه كنه طاسه
مرتبك .. ومشوشٍ .. والدرس طاري
مبارك محمد بن طرجم - والدي الواسر
كتاب القواعد أميه وسبعين صفحه
عجزت أذاكر منه إلا ثلاثين
نومي غلبني والسهر بان ذبحه
يا الله عسايّ أكون من الناجحين
خالد بن ناصر المخيمر - روضة سدير
يا طالب العلم حذرا من النوم
يالله عسى التوفيق دايم يخاويك
النوم له وقتٍ محدد ومعلوم
أيام وبإذن الله تحقق أمانيك
محمد عبد العزيز الخنيفر - أشيقر
يذاكر وخذه النوم وهذا كتابه
مفتوح ومن بكره عليه إختبارات
كان أجتهد ثم حالفته الإجابه
ينجح مع اللي يا خذون الشهادات
سعود بن عبدالعزيز الهزاع - نعام
جنّب عن النوم مافيه رحمه
كثر الكسل والنوم ما يوصل القمّه
إحرص على درسك .. إحرص على فهمه
وإحرص على الدين .. واشحذ الهمه
سميرة سليمان العبرة - الرياض
يا ولد خل عنك لذيذ النوم خلّه
خلّه وقوّ باسك يا ولد قوه
الدرس باكر يصعب عليك حلّه
افهم وما يطري لك بعدها سوه
فلاح بن محمد الدوسري - السليل
ياللي تنيم على كتابك
بكره تصحى وتندم
تبغى التنافس مع أصحابك
غيّر طريقك وتتقدم
إبراهيم بن راشد آل مغيرة - ضرماء
لا والله إلا زان جوّك وذاكرت
وعز الله إلا خذت عالفصل الاوّل
لنّك بالاله حاسبنها وفكرت
باقي ورايه ليل عسر مطوّل
ليتك على كتابك في الدرج سكرت
حلمك عرفته ما يبيله مؤوّل
عبدالله بن لافي – الرياض
صورة العدد - عدسة الزميل محمد اليوسفي
نستقبل مشاركاتكم على إيميل الخزامى:
rb-khozama@alriyadh.com
أو الفاكس رقم: 4871070
ونرحب بالصور الهادفة والطريفة