لو عندنا من غيب الأيام رسه الادمي مصلوح نفسه يدله

بيت وصدى

أرسل للصفحة الأخ منصور شليويح العنزي بيت الشيخ محمد بن مهلهل الشعلان الذي يقول:
لو عندنا من غيب الايام رسه
الادمي مصلوح نفسه يدله
وكان صدى الشعراء حول البيت المطروح:
الادمي ماهو بكيفه وحسه
ربي يعلم الغيب دقه وجله
امش بطريق صح بالحيل جسه
يحتار من يرقبك ويجيه عله
لايرتخي حبلك وبالك تمسه
وباكر نهار فيه شمسه وظله
حمد محمد الحنو - عودة سدير
حياتنا مابين رده وعسه
اما الكدر او غرة مسفهله
الغيب لو شفناه خير نمسه
وكلا درى من جور وقته يظله
من يقتنع بالصدر ماشي يوسه
دون الرضا ياناس عالكبد عله
جمال صالح الحنيني- القصيم
اصبر ترى الدنيا صعيب معسه
ما لك عن المكتوب لو به مذلة
والى طرى الطاري فلازم تجسه
أن كان ما يصلح فجنب وخله
ابعد عن اللي مذهبه فيه خسه
لا بد ما ياقع بعثره وزلة
علي الرشيد - رياض الخبراء
لاتحسب أن العلم شي تدسه
العلم عند الله دقه وجله
لامن ضربت الدرب لازم تعسه
وترى طريق الخير محدن يمله
وافهم خويك والحذر لاتحسه
دله على الخيرات واحذر تذله
والى ضربت الدرب لازم تجسه
ودرب الوعر ياصاحبي اليوم خله
محمد بن عبدالعزيز الخنيفر- اشيقر
غِيب الليالي ماعرفنا مجسه
ضيف ٍ يجس الادمي في محلّه
بامر الولي ياتي بيوم ٍ نحسه
فعله بخير وشر ياتي بحلّه
والادمي لا شاف شي ٍ يمسه
عنه يروح بعيد مهما حصلّه
مشعل بن صنت العصيمي - الخرج
خلك مفتاح لخير والشر دسه
ما يستوي الخير والشر قله
الرجل يبعد عن كلام يحسه
واللي يحب الميل بالساس عله
احد مثل هداج ويعجبك حسه
ماهو كما رس ن ما احد يدله
صالح محمد البشري - الرياض
احد يحب الخير واحد يدسه
والرزق عند اللي يعلم الغيب كله
بعض الاوادم يعجب الناس حسه
والبعض الآخر شوفته ماتمله
احد يجيب العلم واحدن يوسه
واحد صدوق بدق قوله وجله
خليف فهيد الحربي - الرياض
نمشي على رسم المقدر وحسه
بأمر الولي تصريف دقه وجله
والرزق همه لا تشيله ودسه
ما تستفد من شيلته كود عله
أسعى لرزقك وأطلبه دوم عسه
وابعد عن الاحقاد والذنب ذله
خالد عبدالله حمد الصفيان- الرياض
بعض البشر لازال يشْتِم "بأمسه"
وبعض البشر دمعه على أمسه يهله
ماراح مات بْكلِّ مافيه إنسه
واللي بقى لك من حياه استغله
نور الأمل خِذ لك مِنِه دوم قبسه
وحسن الرجا بالله إلبسه حله
الآدمي مايملك أقدار نفسه
الرزق عند الرب دِقه وجِله
ناصر جمعان آل عوض - وادي الدواسر
مع ملاحظة عدم مطابقة عجز الشطر الاول للأبيات في الرد الاخير
بيت الاسبوع
ارسل للصفحة الاخ حجي عايد المفضلي من الرياض هذا البيت للشاعر منصور بن رمال والذي يقول:
من لا ظهر صيته بطيب وهو حي
ماظاهر له صيت عقب المماتي
ويأمل مجاراته من الشعراء عبر هذه الزاوية
نستقبل صدى هذا البيت
بثلاثة أبيات فقط خلال ثلاثة
أيام من يوم النشر
ويكون الإرسال عبر الإيميل:
rb-khozama@alriyadh.com