صوت الصورة

شايب ويأكل حلاو أطفال
ويمشي مع الناس ما همّه
عز الله إنه وسيع البال
لا أحدٍ يلومه.. ولا يذمّه
يشفق على ماضي الاجيال
يوم الفرح والناس ملتمّه
سلطان أحمد العضيدان - الغاط
هذا حلاو القطن ما هو يفيدي
كلّه من السكر ولا عاد به خير
وأنته كبير السن ورجلٍ رشيدي
أرفق على نفسك وأنا اقول ما يصير
فعلك ترى مخطور.. أكله يبيدي
أرفق على نفسك ترى منك تقصير
خذها نصيحه.. وانتبه لا تزيدي
أقول جاك العلم والقصد تذكير
محمد عبدالعزيز الخنيفر - أشيقر
شايب يبي يرجع ولد يا جماعه
يلد له محروس الأعيان بالعين
يريد لحق الركب والوقت لاعه
يأكل من الحلوى وذاق الطعم زين
قلبه خضر للعرس عنده شجاعه
يبي يعدد يجمع البيت بيتين
لا واهنيه حيث زاد استطاعه
بالرغم من عمره اسنين واسنين
خالد ناصر المخيمر - روضة سدير
يا شايب الرحمن تأكل شبابك
وتعيش بالأمان وأمن وسلامه
صورك من صور حضرة جنابك
وعليك من أرض الشام لبس وعلامه
جاك الخزامى وجيت يمّه وجابك
وعلى شرف مصورك بعز وكرامه
شجعان المقاطي - الرياض
شايبٍ ركّز عيونه بشيٍ ينظره
عزتي له من زمانٍ جفاه وعذّبه
الحروب اللي كلت يابس الشي وأخضره
يا الله تفرّجها لنا وله تحقق مطلبه
وقتنا الحالي تغيّر.. وش اللي غيره
كل شيٍ من مكاسب يدينا نجلبه
مبارك محمد بن طرجم - الرياض
يا أبوي أرفق على نفسك
حذرا على النفس تتعبها
كبير ولا تزوّد بجرحك
نفسك عزيزه وترهقها
وراك ناسٍ ترى تحبك
وحياتك اليوم تسعدها
هذا الفعل صعب ويضرك
حافظ على النفس جددها
ريان محمد الخنيفر - الرياض
عودٍ علامات الدهرقد وطنّه
يمشي بوسط السوق ويحلي الريق
يبي يعوض في سنينٍ مضنه
عله يفرج بالصدر فايض الضيق
يا عود ارفق خل فيها محنه
خل الحلا للي تحط المساحيق
اللي على عقل المولع تجنه
أم العيون اللي هدبها مطاليق
حمد عبدالله الوايلي - حوطة سدير
نرحب بمشاركاتكم الشعرية وما تلتقطه عدساتكم من الصور الهادفة والطريفة على إيميل الخزامى:
rb-khozama@alriyadh.com
أو الفاكس رقم: 0114871070
ويا هلا..
صورة العدد تصوير معد الزاوية