صوت الصورة

فوق الجمل رجلٍ يكلم بجوال
يمشي ولاهمّه بواري واشارات
ما يلقطه ساهر على كل ابو حال
ولا ينقضي وقته يدوّر طرمبات
يا زينها يا ناس لا زانت الحال
وأصبح معك قعده وحاشي وخلفات
ما تجدد اللوحه ولا تدفع المال
ولا تنتظر موقف وساحة كراجات
عبدالكريم النغيمشي - لوذة
ما زالت الناقة تنقل هل تشاد
مع المواتر يركبون البعارين
شف الذي قاعد على الكور معتاد
يكلم مدامه وش تبي من الدكاكين
عن المدينة ساكنٍ بريف وأبعاد
مدري من الحضران ولا بداوين
عطية الرحمن من ضرعها الزاد
لو جاع راكبها زهابه بديدين
سعود عبدالعزيز الهزاع - نعام
يا ركب من عندنا فوق مطواع
حر هميم يقطع اقصى الشوارع
لاهوب جافل ولاهوب ملتاع
ولاهمته كثر المواتر تسارع
عليه ركبي ما تبضع ولاباع
يكلم الجوال ساير وبارع
يقطع مسافة والمسيرة على ساع
هو يختصرها لو تجي مع مزارع
حمد عبدالله الوايلي - حوطة سدير
هذا الفعل فوضى ولاشك محظور
على جمل يمشي يهاتف رفيقه
وناسٍ على دباب والدرب مخطور
هذا التهاون للأسف ذي حقيقه
يبي لهم توجيه عاجل على الفور
واللي بدربك أنتبه لا تعيقه
محمد عبدالعزيز الخنيفر - أشيقر
بالهون بالهون يا الهجّان
مشيت بالشارع المليان
طريقك اليوم بالبرّان
العشب تلقاه .. والغدران
واليوم جوالكم رنّان
اتكلّم أهلك مع الاخوان
عبدالكريم عبدالرحمن السلّوم – القرائن
أقول له ممنوع وألفين ممنوع
راعي الجمل هذا ترى اليوم ضايع
يكلم الجوال والصوت مسموع
نقول له مسكين وللنفس بايع
ريان محمد الخنيفر - الرياض
وسط البلد ظاهر وماشي له أميال
لا يمسكك ساهر يزيد العقوبه
دربك تراه البر واضح ادروبه
كم واحدٍ من صورتك صار مهتال
وكم شاعرٍ في الوصف هبة هبوبه
جنب عن دروب الخطر ريّح البال
وأعرف ترى الأيام دوم محسوبه
خالد ناصر المخيمر - روضة سدير
الفلل زايد شوارعها جميله
والخطر يهلك يا سايق الدباب
شايل الطرّاحه البيضا الطويله
عرّض الحمله ونفسه للصعاب
كم ظروف صعاب وأيضا ثقيله
تجبرك لأفعال غير المستطاب
سعود عائش الحربي - جدة
نرحب بمشاركاتكم الشعرية وما تلتقطه عدساتكم من الصور الهادفة والطريفة على إيميل الخزامى:
rb-khozama@alriyadh.com
أو الفاكس رقم: 0114871070
ويا هلا..
صورة العدد السابق