الناس اصناف وكلاّ ًحسب عنوانه

الناس اصناف وكلاّ ً حسْب عنوانه
دنيا وفيها البشر اشكال والواني
فيها الذي كنّه الألماس والدانه
صافي ضميره نقي والراس صنياني
مثْل المزون المريفه دوم هتّانه
من خيرها يرتوي من كان ضمياني
وفيها الذي كنّه الازهار ريّانه
يفوح من طيبها للناس مزباني
منبع كرم وجْودي ما صكّ بيبانه
فيه الوفا للقريب وللذي عاني
وفيها الذي ماله ارقام ٍ ولا خانه
مثل الصفر في يسار الرقم عدماني
ماله عزوم ٍ وناره دوم خمدانه
ان غاب والاّ حضر ماحدا ً بشفقاني
وفيها الذي ضحكته بالوجه مليانه
يخفي وراها الحسدْ والحقْد مرضاني
حلواً كلامه عسل يعْجبك بلسانه
بالقلب سمّه يشيله ماله اخواني
ناس ٍفي درب الشقى للشر عشقانه
ترضي هواها وترضي كل شيطاني
ويالله انا طالبك والروح شفقانه
خوّة كريم الجناب وذرب الايماني
صدق ومروّه كرم مدهال ضيفانه
اللي علومه تنومس قاصي وداني
مقرن بن متعب - الهرف