انا ياكبار سليم للحق طلاب

حبيب يقول لبن عتقان:

سلامي سلام مسيرٍ يطرق الباب
على ساير العربان ماهو بغادي
أنا ياكبار سليم للحق طلاب
أنادي ولا ادري من يجيب المنادي
عبدالله عتقان
هلا مرحبا ياضيف مليون ترحاب
على سنة الأسلام والجو هادي
تنادي يأبو فيصل بدون أية أسباب
تراها مواقف بالسيوف الحدادي
حبيب العازمي
نعد الليالي مالها عد وحساب
وبين البحر والضلع تسعين وادي
تشوف النجوم وتحسب إن القمر غاب
وأنا أعرف هبوبك حر وألا برادي
عبدالله عتقان
ليا سلمت اللحيه وسلمن الأشناب
لا تسمع لنشره عابره فالروادي
يجوز إن به ناسٍ يثيرون الارهاب
يبون النصر يقضي على الاتحادي
حبيب العازمي
يازين المروه لو على قطع الارقاب
وراع المطيه محتفظ بالشدادي
أنا مارتفع ضغطي على حرق الأعصاب
أعرف المنافق والكذوب الربادي
عبدالله عتقان
وأنا ماعتبرت الرجل مخطي ولا صاب
ياليت أعتقادك يتفق بعتقادي
تعجلت يالروقي بتاريخ الأنساب
وأنا حاسب إنك بالحياة اقتصادي
حبيب العازمي
مزال القلوب إنظاف والنور جذاب
أبمزح معك واللي حصل شي عادي
يقولون قلع الضرس يثر على الناب
وأنا أقول قلع الضرس مفروض بادي
عبدالله عتقان
أنا معك فالوقفه بسيفٍ ومشعاب
ولا أمزح معك لو كنت غاية مرادي
قلعنا الضروس وهونت كل الأحزاب
وهالحين مافيها عناد وجهادي
حبيب العازمي
على طاري المشعاب والرمح وذياب
مشاعيبكم كثرت سواة الجرادي
إذا ماهداك الله ترى فيك مضراب
وهات الفتيله عند خشم الزنادي
عبدالله عتقان
مشاعيبنا فالروس سوت لها أعجاب
وخلتك تهرب من عشيرة وغادي
وياكم من هرجة عطت كل مجناب
ولا دنست قوم الثياب الجدادي