غيمة شوق

نسيت إني زعلت وجيتك اشواقٍ تسوق اشواق
تفضل لك من أفراحي إلى اخر دمع احداقي
أجيك وجيتي غيمة بها وبل ولها براق
ليا من خلت بارقها تجي وتصافح اوراقي
تنثِّر من معانيها على ارض الورق مالاق
ليا من ساقها شوقي بليا منة الساقي
وتنبت بالورق وردة زرعها خافق مشتاق
قبل تنبت على الدفتر نمت في داخل اعماقي
حبيبي والزعل كذبة ولابه بالغرام افراق
ليا من غبت عن عيني شغلني طيفك الباقي
واذا كان الزعل واقع فهو ما يشمل العشاق
لاني ضمنهم عاشق ولافكرت بفراقي
حبيبي وأنت ما تبطي بلاك الليل ما ينطاق
اجل وشلون لو تبعد بعيد وتنوي اغراقي
ارافق يوم تتركني عناي ودمعي المنساق
سحابٍ يم وجناتي يسوقه صافي اشواقي
أسير الهم بغيابك أسير وعايشٍ برهاق
وليا من جيتني همي لعينك يعلن اعتاقي
حبيبي والهوى اكبر من دموعي وجفن فاق
حبيبي والهوى أكبر من إنك صرت خفاقي
حبيبي والهوى ما هو مجرد شعر وسط اوراق
اشوفه شيء اخر شيء اكبر من شقى شاقي
اشوفه كوكب عالي مكانه عالي الآفاق
نحب نموت ما جينا على مفهومه الراقي
سليمان راشد الغفيلي