الوفا والجود والتوحيد هم عنوانه

ابتدى بسم الإلاه المعتلي سبحانه
حافظ ارواح البشر فرضٍ عليّ ابدابه
جل شانه مخلص الديان من ديانه
في نهارٍ صالح النيه يحسب احسابه
اطلبه يفتح لصادق طلبتي بيبانه
عن دعا المسلم بجوده ما تصك ابوابه
اطلبه يحفظ ملكنا درعنا وخوانه
ويحفظ من كان في رايه وكل اصحابه
الملك ميزان حق ما اختلف ميزانه
دمع عينه من غلا شعبه يبل ثيابه
اشهد انه ساعد المسلم وحقه صانه
ما تخلا سيدي فالوقفه الغصابه
يالله انك تحفظه حفظ الحرم واركانه
واحدٍ همه رضا ربه وحفظ اكتابه
والله انه مثل ابوه امر ونهي واديانه
ما خسر يوم اخد امه حيث ربي جابه
من ذكر عبد العزيز وسيرته وايمانه
قال كل الناس في ما تبتغي كذابه
فالكويت ولا سهى عن مملكة جدانه
نابةٍ قلبه على حب الوطن وترابه
استعان بواحدٍ ما ينخذل من عانه
ثم مشا من يمة المشرق يحث اركابه
فكره الشاغل ودقة قلبه الرنانه
الرياض ومدخل القصر الكبير وبابه
صيرمي مثل ذرعان الفهد ذرعانه
عاصبٍ راسه لغرات الضحى بعصابه
حامل سيفه ورمحه فوق روس امتانه
ماش هاك الوقت لا مدفع ولا دبابه
ما معه قوات ما غير فرسه وحصانه
وأدمٍ يلمع ودم الظالمين خضابه
الفتيله تشتعل من قدحة الصوانه
يدّعي بالخير والا الشر ما يدعى به
اربعين من الرجال الطيبين اعوانه
موقفٍ يقول كلٍ جعل ما يبلى به
اعتزى عزوة معزي واعتلا سلطانه
وابتدى خصمه بسيفه قبل لا يبدا به
ثم قطع راس المسمى ثم حذف لحيانه
والسعد عقب العهد طير السعد غنابه
حالف ان الحكم ما يقعد مع الخوانه
استعيده في نهارٍ فعلنا يدري به
الوطن حنا هله عدواننا عدوانه
الوطن حنا هله ومجودين اطنابه
واصبح العارض لبوتركي يجر الحانه
السعد رفرف وزان الكيف يا شرّابه
ونجد رحب به وللحاكم فتح ريعانه
وخضعت له كل وديان الوطن وهضابه
ما خسر من فضل ربه في جميع اكوانه
والمكابر والمعاند ما حسب لشنابه
الوطن ما ارتاح لين انه جمع شتانه
ما تريح لين نامت ناره الشبابه
واصبح المسلم بخير وخازي شيطانه
ما أحدٍ من عقب أبو تركي يرد الجابه
من هرج عقبه عياله يقطعون السانه
سيف ابوهم في يديهم قاضبين انصابه
من سعود ليا ابو متعب والبلد طربانه
عيشة المسلم رخيه ما تجيه انهابه
كافحوا لين اخلطوا مسكه على ريحانه
والامن والعز من فضل الولي يلقى به
في ذرا صقر العروبه وان نهض جنحانه
السعد والعز في وجهه وفي مخلابه
ونايبه سلطان اخوه اليا نهض حجانه
الاسد مثله تخاضع له نمور الغابه
نصرة الدين وهله والعدل نصب اعيانه
فيصلي كل ما شافه خصيمٍ هابه
وسيدي سلمان دايم فاتحٍ ديوانه
في الأمور الكايده يعدى به ويبدابه
عادلٍ فالمسلمين ولا حكم بخيانه
العداله والامانه مسلك يسعى به
كلهم غيث علينا مايع ربانه
ينشرح صدر الصديق اليا التحم سحابه
الوفا والجود والتوحيد هم عنوانه
من بناله مسجدٍ في ظلهم صلى به
المشاعر والقلوب بحبهم مليانه
ما يزعزعها الحقود بدعوته واحزابه
حبهم يجري مجار الدم مع شريانه
دونهم للسلم سلم وللحروب حرابه