حنا على صدر الملاحم عناوين

هز اليمين تهز معك الملايين
ياالحر الأشقر ياالفريد النداوي
هزت يمينك ياأبيض الوجه حدّين
حدٍ هلاك وحد مدٍ رهاوي
فيها من الفزعه وصوف وبراهين
وفيها من الأجرب شطيرٍ دماوي
كنك توري شذرته للمعادين
واللي على ضر المسلمين ناوي
سيفٍ فعوله بينه من هاك الحين
يومه على رقاب المعادين هاوي
ياسيدي يا معليٍ راية الدين
العز عزك والفخر والنخاوي
تهتز من هزة يمينك سلاطين
وعروش حكام وجيوش ودعاوي
والنخله اللي تنتصب بين سيفين
حياتنا من دونها وش تساوي
حنا على صدر الملاحم عناوين
وحنا هل النجدات وأهل الغزاوي
وحنا سلام وقبلةٍ للمسلمين
ونفوسنا من فضل ربي رضاوي
اللي يشوف أفعالنا فاتحٍ عين
واللي عيونه ما تدله شقاوي
عند اللقا نكشف له الفعل ويبين
ويشوف لو هو في نظيره عماوي
جندٍ أيلا ثار العسم والدخاخين
الكل منّا دون حده فداوي
نحمي وطن أرض القيم والمصلين
والمسجدين ووحي دينٍ سماوي
حد الوطن دونه أسود وشياهين
وجيشٍ على ردع المعادين قاوي
ما أخبلك يااللي تحسب الفرس صلفين
ما تدري إنّا مخلفين الهقاوي
من رامنا نفريه بالعزم فريين
فري الرشا من زاعبين الدلاوي
فينا وله للقادسية وحطين
وذي قار فيها كم تطيب الحكاوي
نحكي ولا نحكي على الناس شكلين
صوتٍ لنا في محفل المجد داوي
حقايقٍ تنشاف ماهيب تخمين
ولاهيب لاصحاب البصيره حزاوي
عقاّل لكن في الحرايب مجانين
فيها نطّوع بالفعل كل غاوي
حنا على وجه البسيطه رفيعين
منزالنا في نايفات العلاوي
تاريخنا يشهد لنا بالدواوين
لامجادنا من سالف الوقت حاوي
من أنت ياخطو الفدامه ومن مين
تحمي حمانا ياقليل المراوي
حنا هل العوجا كعام المعادين
وحنا هل الطولات وأهل الحضاوي
ياما وقفنا وقفةٍ تبهج العين
وياما عطينا من كبار العطاوي
من غيرنا كسب الفخر والنياشين
ومن غيرنا من منهل العز راوي
قومٍ على شرب المصايب مضرّين
نجرح صواديف الزمان ونداوي
يقودنا راس الملوك المسمّين
سلمان سلمان الفخر والعزاوي
نسل السعود الغانمين الميامين
فخر الملوك مزبنين الجلاوي
لنا ملك ما يختلف فيه شخصين
من صلب أبو تركي بعيد المداوي
خلى الكويت ووجهته يم يبرين
وهو على نجد العذيه شفاوي
وحول عليها والحضر والبداوين
يقرون في عينه عزوم ورجاوي
جاها معه من هو معه مستميتين
وخذها بفعله ما خذاها مناوي
ياسيدي حنا معك عسر أو لين
نهدر كما سيلٍ غزيرٍ نحاوي
وحنا بعزك سيدي مستعزين
دون الوطن ناقف سيوف ومطاوي
نعم عطيناك العهد والعهد دين
نمشي على ذات النهج والخطاوي
وأسلم وسلّم لي على شم عرنين
حرٍ على الهقوه بعيد المداوي
نعيمن في مليار في ألف نعمين
باللي لعزك ياوطن ما يراوي
أبوه سلمان الملوك الميامين
وسيرته تغني عن جميع الرواوي
وله من بنود الفخر تاريخ جدين
وله مفخرة فعلٍ تعدى الهقاوي
من جده معزي خذا العزم واللين
ومن حزم سلمان الوطن به حراوي
ونعمين برجالٍ عن الدار حامين
جيشٍ على العدوان ماهوب ياوي
الحد سور وسورنا كنه الصين
عجايبه في كل شهمٍ ضراوي
لو هو يشوف الموت بين الحجاجين
يقدم ولا يخشى الخطر والبلاوي
سطوة رجالٍ ما تهاب الميادين
تودع مجاميع العوادي شلاوي
حنا على عز ومعزة وتمكين
والدار ماهي للخوارج ملاوي
واللي بوحيه نزل الطور والتين
الكل منا دون حدك فداوي
شعر / محمد بن سعد العجلان