هموم وتباريح

مركب غرامك ساقه الموج والريح
أبحر مع أمواج البحور الغزيره
يسبق نواصيب المزون المراويح
اللي مخايلها على كل ديره
لاسدل شراعه للنجوم المدابيح
كنّه يعلمني برحلة مسيره
مما بدا الخاطر هموم وتباريح
يلمها برد الزمان وهجيره
انظم هواجيسي سواة المسابيح
وافرك خرزها بالصبر والبصيره
وافلها لاشعلت بيض المصابيح
وبقيت اعاتب خاطري واستشيره
كل الغلا والا القلوب المجاريح
يكفها همس الغرام وزفيره
يكفي جفاء والا موده وتجريح
اليا حسبت الاوله والاخيره
وين الغلا اللي قدمه اقوم واطيح
لو اتحرّم بالفشق والذخيره
جريتني بالحب من غير تصريح
واليوم شرهاتك عليه كبيره
سلمتك ابواب الغلا والمفاتيح
كلي ثقه مارضى عليك الكسيره
ما بيك تاخذك الروابع مشاويح
وتاخذك غفلات السنين الخطيره
وان كان اخذك الموج لاساقه الريح
يالله عسى في ريح الامواج خيره