قاداتنا ساداتنا ما تسادي

ما دمت حي وهاجس الشعر موجود
والقافية على هواي ومرادي
والله لا اعديها عن النقص للزود
واني لوظفها لخدمة بلادي
وابعد بها عن كل ناقد ومنقود
واجهر بها في كل محفل ونادي
واذكر بها كسابة المجد والجود
اهل الشيم واهل القيم والمبادي
آل السعود مناصرة كل مضهود
بالعدل والحق المصيب الوكادي
حكامنا مقدامنا هم هل الفود
قاداتنا ساداتنا ما تسادي
في ظلهم نعيش بافراح وسعود
الخير سايد والرخا بازديادي
من خير من عطاه ماهوب محدود
المملكه تشهد نمو اقتصادي
وحضارة في عدة سنين وعقود
بين الأمم صرنا بمركز ريادي
كله بفضل مدير الافلاك والنود
رب الشجر رب الحجر والعبادي
ثم حكم من يرجع له الراي ويعود
مليكنا سقم الحريب المعادي
عبد الله اللي يرفع الضيم ويذود
عن كل من ضاقت عليه المبادي
طبيب جرح اللي من الوقت ملهود
حبيب كل الشعب حاضر وبادي
وولي عهده محزمه درعه يقود
جيشٍ سلاحه دِين واحدث عتادي
سلطان ابو خالد ومن جاه موعود
بالخير والفزعه وفك القيادي
اسرة وفاء والفضل ما هوب مجحود
واللي يقول الصدق ما هوب غادي
الله يخليهم لنا حصن وسدود
رموز نهضتنا بياض الايادي
واحفظ وطننا من عبث كل مطرود
سماعة الغادي هواة الفسادي
هذا وطن هذي مواثيق وعهود
هذي قضيه ما عليها مزادي
موقف موحد كنه السيف مجرود
يدين حتى مدعين الحيادي
المنحرف يروح ما عنه منشود
فاجر لو انه يدعي بالجهادي
ظلم ابرياء قتل منظم ومقصود
جريمة نكراء ارتكبها اعتمادي
وصل وذاه لآمن السرب والعود
والساجد العابد وطفل المهادي
جرمه بحق الدين والعرف مشهود
ما فاز بالبيضاء كساه السوادي
ما له جزاء من عندنا غير عبرود
إما يفج الراس والا الثنادي
هذاه حق اللي من الارض مولود
وانكر حقوق أمه وشال الزنادي
واللي تأثر فيه طايح ومرصود
مصيرهم بإذن الإله النفادي
وش عاد لو شالوا فتيله وبارود
ناس تدانت روسها للحصادي
قتيلهم للعار والنار والدود
واللي هرب ما يهتني بالرقادي
بنحورهم ضباط وافراد وجنود
نايف يوجههم والادنى سدادي
فراج وسيود الكرشمي