عبدالله وسلطان أهل العدالة

أسوأ خبر من سمعته اليوم ملهود
فهد عن الدنيا تقافت رحاله
العاهل اللي ينص ساعة الكود
حلال عسرات الأمور بساله
قايد بلدنا مقدم العرب ماكود
وسام الفخر والعز بالفعل ناله
يشهد له التاريخ والعالم شهود
الفيصلي عرب النسب والسلاله
قلبه من البالود وأقوى وبه زود
والين من الديباج للي صفا له
يبكي عليه الشعب مافيه منقود
ذخر المحيج ليا تردت حواله
ويبكي عليه الطفل و الكهل والعود
ويبكيه شرق ديارنا مع شماله
وجنوبها والغرب وجبالها السود
وكل دعاله بالعفو في مجاله
أبو اليتيم وعون من جاه مضهود
وعز الصديق ومن لجى ولتجاله
يا لله عساه بجنة الخلد موعود
ويظله الله يوم حاجة ظلاله
نرفع عزانا لأسرة الخير والجود
آل سعود أهل الوفى والشكاله
عسى العوض بأشبال وأبطال وأسود
عبدالله وسلطان أهل العداله
إخلاص لله ثم لعيال آل سعود
صفوة هل التوحيد ساس الرجاله
بيعه لهم في عهد ورثن من أجدود
وحفيدنا نوصيه حمل الرساله
يا لله عساه بجنة الخلد موعود
ويظله الله يوم حاجة ظلاله