أمير نجد.. وتاجها

بدع القصيد يطيب في مدح سلمان
سلمان ابن من لم شمل الجزيره
أمير نجد وتاجها طير حوران
يا سعْد نجد وسعدنا في اميره
انا اشهد أنه من طويلين الايمان
رجل حكيم ومن رجالٍ بصيره
وافي وله في صفحة المجد عنوان
سجل له التاريخ في كل سيره
فعله ينومس عالي الصيت ما هان
به ميزةٍ ما هيب تنسب لغيره
ينقل حمولٍ فوق حمله بليهان
له همةٍ بين الأودام كبيره
كم من قضيه حلها عالي الشان
مرت عليه ويعتبرها يسيره
مشاكلٍ منها يروغن الاذهان
يحلها لو المشاكل عسيره
منصف وللانصاف معنى وميزان
شوره براسه والعرب تستشيره
تنشر له البيضا على مر الازمان
ويبقى لنا ذخر وعسى الله يجيره
محبته للخير جت خير برهان
لافعاله الجزلات في كل ديره
يرعى اليتامى والسعد والرضى بان
بوجيههم من زود عطفه وخيره
ما هو يحسّب لو يزيدن الاثمان
قدّم وكمل في حياته مسيره
يرجي ولي الكون رحمه وغفران
يالله عساها له حياةٍ سفيره
ما نحصي أفعاله على كل ميدان
افعال طيب وفي عددها كثيره
أحمد بن سعود الحمد