أمر من الله ما لنا فيه تعديل

ماجور يا شعبٍ ضحا اليوم صابه
علم صدم كل العرب عقب ما قيل
يوم الوزير أعلن وكمل خطابه
تغيرت عقبه وجيه الرجاجيل
وكل سكت ماردها ربع جابه
أمر من الله ما لنا فيه تعديل
راح الزعيم اللي عزيز جنابه
اللي على شعبه مثل شاطي النيل
دنياك هذي وقفه وإنقلابه
كل شكا منها نكاد وغرابيل
راح النبي المصطفى والصحابه
والموت حق ولا عن الاجل تأجيل
وفقيدنا يا الله تسهل حسابه
وتظلله يا والي العرش تظليل
غيم علينا الحزن حزة غيابه
ونهارنا عوَّد مثل مظلم الليل
شعب تكدر شايبه مع شبابه
عليك يا حامي وطنا عن الميل
يالله طلبتك دعوة مستجابه
يا منزل التوراة وكتاب الأنجيل
ونزلت نور يستدل بكتابه
على رسول الله جملة وتفصيل
عفوك وغفرانك وحسن المثابه
عن المليك ونزله خير تنزيل
ويا الله تجعل في يمينه كتابه
إليا نفخ بالصور عبدك إسرافيل
وتسقيه من حوض لذيذ شرابه
يوم الحساب أللي به الجمع ويهيل
خلدت مجدٍ ما يعدد حسابه
تشهد به الأجيال جيل بأثر جيل
شعبك تعلا في عوالي هضابه
علم وعمل وأنته معه تسهر الليل
وخدمت بيت الله بعزم ورحابه
وسهلت درب مدور العلم تسهيل
من حج بيت الله وطاف وسعى به
يمشي بأمان ويرفع الرأس بالحيل
والمسجد الثاني وقف واعتنى به
كمل صعيبات المشاريع تكميل
عز الغريب اللي شكا والتجابه
أبو اليتامى والضعوف المهازيل
فهد العروبة والفخر والمهابه
فهد التضامن والتلاحم عن الميل
فهد الذي يوم أدبر الحق جابه
يوم ابتلى جاره طلع طلعة سهيل
قاد الجيوش بقو عزم وصلابه
بالجو نار وبالبحور الأساطيل
رد الكويت اللي تحول نهابه
يوم اغدروا به طامعين مهابيل
واليوم فهد العرب قفت ركابه
برعايتك يامن تكفل إسماعيل
وسلمتها لمحنكٍ مرتضى به
هو قايد الأمة ولا فيه تشكيل
والشعب قدم بيعته واحتفى به
أللي حضر وأللي يكز المراسيل
ملك قلوب الشعب بأول شبابه
فضلك يا أبو متعب علينا هماميل
نطلب لك التوفيق في كل جابه
آمين يا مرسل بالآيات جبريل
وولي عهدك سيدي بالنيابه
سلطان أبو خالد بعيد المناويل
سيفٍ تسرك سلته مع نصابه
للشعب غيث وللمعادي غرابيل
شديت عضد الشعب شد العصابه
الله يمهل لك بالأيام تمهيل
وحكامنا سور الوطن دون بابه
بأيمانهم جرد السيوف المصاقيل
وصلّوا عدد ما هل وأمطر سحابه
على رسولٍ بين العدل والميل
نبينا اللي بالهدا يقتدى به
محمد اللي فصّل الدين تفصيل
رباح صالح الحصني الحربي