قبلة ملايين البشر

ضمت عروق اجسادهم في ثراها
ارض لها في كل ساعة محبين
تكبر وتنجب ويتجدد صباها
الله عليها تطوي العمر وتزين
ونقول جعل اعمارنا من فداها
ارض يكفيها من الكون ثنتين
قبلة ملايين البشر وارض طه
للكون شمس وللبطوله ميادين
من مبتدا الدنيا ليا منتهاها
يلقى بها التاريخ مجد وبراهين
ليا تصفح وجه الارض وقراها
الله حفظها عن جميع الشياطين
اضفى عليها ثوب الامن وكساها
تمسي على صورة تبارك وياسين
ويجيرها ربي ويسعد مساها
والفجر تصبح مع صلاة المصلين
ليا ملا صوت المآذن فضاها
فجر من الرحمه شعاعه من الدين
يمتد فيها لين تأمن حماها
من وين نبدا بالتفاصيل من وين
وشلون نكتبها ونلحق مداها
مد النظر فيها من سنين وسنين
تلقى النجوم اللامعه في سماها
وانا اذكر اني قبل سته وثلاثين
ضيف نزل في ربوعها واهتداها
قالوا لي ارضك ضمها داخل العين
تهجها واحفظ معالم وطاها
باكر ليا منك فردت الجناحين
قل هذي ارضي وافتخر واتباهى
قالوا لي ارضك هي ملاذك عن الشين
ترى رضانا كلنا من رضاها
هذي مهادك يومها اللبن والطين
عطها ولا تبخل وتلقى عطاها
ترى لنا دين ولها مثلنا دين
لو ما عطت من جوفها كود ماها
سيرة وفيها للتفاخر عناوين
تحدث التاريخ عن محتواها
قالوا لي انه جاء من الشرق ستين
سربة شغاميم جذبهم نداها
في ضف ابو تركي زعيم السلاطين
صقر نزل في قلبها واحتماها
ما جالها ضيف من الناس الاقصين
داره وجدد وصلها ما نساها
لين دروب العسر بالعسر واللين
لين ارجهنت واستعادت صفاها
ارض تساوت للشيوخ الميامين
ثنوا لها حتى تحقق مناها
من شافها في ذورة العز هالحين
يطلب من الله يرحم اللي ولاها
يشوفها راحت فياض وبساتين
يوم انفجر شهد العيون بضماها
صحراء غدت دوحة ورود ورياحين
يعج بانسام الخزامى هواها
في ظل ابو فيصل يجي دلها زين
اللي ليا قالت فهد ما عصاها
صعد بها حتى تعدى السماكين
شيخ ليا شاف المعالي رقاها
هذا فهد واللي على يسار ويمين
صفوة رجال ما خسر من رجاها
ان قلت ابو متعب طليق الحجاجين
قلت ارضنا الله بالمكارم حباها
ليث توطى روس كل الثعابين
من هيبته قامت تعود وراها
وان قلت ابو خالد طويل الذراعين
اللي حضنها بينهن واحتواها
بنى لها سور يخيف المعادين
ومن الجهات الأربعة هو ذراها
واليوم هذي هي بلاد الحرمين
الله يصون حدودها ويحماها
هذي هي ارضي وأرضكم بالملايين
ياللي عروق اجدادكم في ثراها
ضيدان المريخي