يا الله عسى قيران مرحوم

في رثاء قيران بن مسدح العنزي رحمه الله الذي انتقل الى جوار ربه في 8 شوال 1425ه:
من غالب العبرات ماهو بمليوم
دمعة وفا ما تختفي باحتجابي
لا والله الا بت مخطيني النوم
عض البهام وونة واقتلابي
امسيت يا عامر من العلم مهموم
والله مصابك يا البناخي مصابي
بالوكر انت الصيرمي مدرك الحوم
والكل منكم كان بالوكر رابي
سيروا على درب لكم شق بعزوم
فيك العوض نأمل ومعك الشبابي
يا الله عسى قيران مرحوم مرحوم
عساه باليمنى يشيل الكتابي
جاه الأجل من والي العرش محتوم
الفجر مع صوت الأذان استجابي
ومن الخبر جمع من الناس مصدوم
بعصرية هالوا عليه الترابي
والكل منا اقفا وهو تقل منجوم
ساعة موادعنا عزيز الجنابي
عزي لمنهو فارق مقلط الكوم
غيبة دهر ماهي سواة الغيابي
نبع الكرم كنز الوفا ما ادركه لوم
عرق الندا من شبته لين شابي
فقيدة كبرى على كامل القوم
من روسهم ماهو تكمل احسابي