نمر بن صنت شاعر الغزل والقوافي الصعبة

شاعر الأسبوع .............

الشاعر المعروف نمر بن صنت العتيبي رحمه الله.. شاعر كبير له العديد من القصائد الجيدة يغلب على شعره الطابع الغزلي.. تتميز أغلب قصائده بالقوافي الصعبة مما أضفى على أشعاره طابع الجودة.. أبيات قصائده قليلة العدد ولكن جيدة التركيب وتفي بالمعنى.. اشتهرت قصائده بين رواد الشعر..
إليكم مقتطفات من أشعار شاعرنا:
عن موحد هذا الكيان العظيم جلالة الملك عبدالعزيز بن عبدالرحمن آل سعود - طيب الله ثراه - يقول شاعرنا من قصيده:
عبدالعزيز اللي يرو السلايل
على ظهور معالجات الاعنه
من عادته خيله تغيرم القوايل
تسمع لضيعان المفاريد حنه
شيخٍ تخضع له شيوخ القبايل
حكمه بضرب السيف ما فيه منه
يطرح الحذرات لاسود الحبايل
لين الاسود أشبالها صاحبنه
وبمناسبة افتتاح مهرجان الجنادرية عام 1405ه قال شاعرنا:
أقول يوم اني بديت المنصه
هذا بعد جاني خطاب القياده
يوم ان كلٍ جاب شعره وقصه
أنا لي مع الشعار من قبل عاده
أحدٍ ليا منه بغى الشعر رصه
واحدٍ ليا منه بغى الشعر اكاده
كلٍ من الشعار فيما يخصه
وانا اختصاصي لابسات القلاده
اضبط معانيه واجيد نصه
واقول شعر الغزل بوزن وركاده
ومن شعر الحكمه يقول شاعرنا:
محدٍ قنص بالنسر يبغى من الصيد
ولاحدٍ إذا فرخ الغراب وقنص به
البخل بين في وجيه المقاريد
وراع الكرم درب الكرامه يغصبه
والجود بين في وجيه الاجاويد
والنذل ما فاده حلاله ونصبه
أما عن عزة النفس فيقول شاعرنا:
أثر عز النفس للرجال طيّب
أحمد الله ما تعلمت الشحاذه
في حياتي مانجي منها قريب
في عيوني من طرفها شوك حاذه
استعيذ من الدناءه واتغيب
واعتصمت أعن الردى بالاستعاذه
في حياتي مرني وقتٍ يشيب
وعز نفسي واجدٍ فيه الذاذه
النميمه.. صفة يمقتها ديننا الحنيف عن ذلك قال شاعرنا:
أنا بوقت اللي بعيدٍ عن الصمت
ضعاف النفوس مقطعين السوالف
رجالهم يقضب شليلك اليا قمت
لو انت لليمه يحطك مخالف
يجذب لسانك بالردى لو تلثمت
بالنمنمه والكذب مثل المكالف
ما يقبلون اطبوع مثلك ولو شمت
دحامت المجلس حمير المعالف
اكثر بلاهم من هل الدين والصمت
ناسٍ على درب الرذاله توالف
أنا أحمد الله للشهامه تعلمت
أبوي علمني وحظي محالف
أحلم بطاروق الشهامه اليا نمت
والخبل يبتل في سجاياه ذالف
ومن قصيدة أخرى يقول:
خطو الولد سودٍ ثيابه من العيب
ما فيه من درب الرجاجيل خصله
مشتاله المدحور بالكبر والريب
قام يتزين له ابليس ورقص له
ترى كثير النبح ما يحرم الذيب
يملا بطانه والكلاب تحرص له
وظل العدو لو تضربه بالمشاعيب
يضحك ومشعابك ثلاثين وصله
اليا صار ضدك يحتمل للمواجيب
عطه الوقار ولا تنشد عن أصله
ومن قصائده الغزلية قصيدة اشتهرت اذكر منها:
يا نجمة الصبح كبدي منك مرهوقه
لياشع نورك علينا لا تغيبيني
ستاير القلب من فرقاك مفتوقه
اصبر من العام لين انك ذبحتيني
لبيك ياللي تتل القلب وعروقه
كله على شان يوم انك تلبيني
يا قلبي اللي من الغالي دنا عوقه
يا ناس شيروا عليها لاقاصيني
ومن قصيدة غزلية أخرى يقول:
لا شفت برقٍ ودونه غت
عساه يمطر على عدك
ياللي سنينك ثمان وست
نور القمر فيه من خدك
خل التغلي تراني مت
قطاع والخوف ماردك
مانيب نسيك لو أبعدت
مير البلا البعد عن جدك
معالي الأمير الشاعر الكبير محمد بن أحمد السديري رحمه الله وجه هذه القصيده لشاعرنا حيث يقول:
يا مشرف المرقاب خله لمشطون
حول وخل مولع القلب يرقاء
خله لمشطونٍ تزايد به الكون
على عشيرٍ زيد الهجر فرقاء
كبدي من الغالي بها تسعة أطعون
والعاشره يا نمر بالقلب زرقاء
طفلٍ يتل القلب تلٍ بلا هون
يسبأ الفواد ويسرق الحال سرقاء
محدٍ عشق مثلي من الحضر وضعون
شمر وعناز وروقٍ وبرقاء
سهرت يوم أن الخلايق ينامون
ويزيد نوحي كل ما ناح ورقاء
ياسف لي اللي للهوى ما يعرفون
ويا نمر شلاني من الدمع غرقاء
وقد أجابه شاعرنا بهذه القصيده:
عز الله أني شفت برقٍ تخيلون
ما شفت مثله كل ما لاح برقاء
ما أجديت عن قلبي يابوزيد مرهون
وعلى صخيف الكبد وسمٍ معرقاء
عينت بصري قبلنا اوبن لعبون
أهل القلوب اللي من الود حرقاء
وقيس الملوح من هوى البيض مجنون
ينوح مثلك كل ما ناح ورقاء
الود قدامك على الناس مسنون
الهيف والقبله وشامٍ وشرقاء
ودٍ على وضع النقى منه مامون
وشيخ العرب مايدرق الحب درقاء
رحم الله شاعرنا وأموات المسلمين رحمة واسعة وإلى اللقاء مع شاعر آخر. ولكم تحياتي