سحلي العواي.. دقة الوصف وسلامة التعبير

شاعر الأسبوع...

الشاعر المعروف سحلي العواي البرازي المطيري - رحمه الله - شاعر كبير. . ومن أبرز الشعراء له العديد من القصائد تتميز قصائده في دقة الوصف وسلامة التعبير . . تتصف قصائده بالاختصار والجزالة وتتخذ أشعاره طابع المديح وله قصائد في النقد . . يمتلك التلاعب بالمفردة وتوظيفها في مكانها الحقيقي . .
إليكم مقتطفات من أشعار شاعرنا .
من قصيدة قالها شاعرنا في مدح صاحب السمو الملكي الأمير سلمان بن عبد العزيز أمير منطقة الرياض - حفظه الله - نختار منها قوله:
أبي أتمثل يوم فات أول الليل
يوم أنها دكت عليّ الهواجيس
قربت محامسي وبيض المعاميل
وسويّت فنجالٍ بهاره بلا قيس
وقمت أتذكر كاسبين التنافيل
وذكرت كساب الثناء والنواميس
سلمان زبن اللي تمايل به الميل
اليا شان وجهه والليالي تماليس
شيّال حمل اللي تملل من الشيل
وعوق الخصيم اللي بخشمه نعاطيس
معالي الأمير الشاعر الكبير محمد بن أحمر السديري - رحمه الله - اتصف بالكرم وبمساعدة المحتاج فعندما ألمت الحاجة بشاعرنا قال قصيدة يمتدح بها الأمير السديري أذكر منها:
يا فهيد وقتي بينتبي حزوزه
أهوش من دونك بحاضر ودينه
ماشفت حتّى الدوج طاحت قزوزه
من كثر ما يسحب على بانزينه
يوم اقدره جايز وفوق المجوزه
واليوم خلّه نوح خلا جنينه
خله لعله يابن سحلي هموزه
لحقت على العطرا وابو زيد وينه
لو أصله كان أشترى مايعوزه
أبدله والا اشتري له مكينه
شيخٍ مجرب من وراء الناس نوزه
ماهو بنا كل العرب خابرينه
أمارته ماهي عليه امغزوزه
ساسٍ عريب وتلّها في يمينه
محمد اليا جته اليدين معيوزه
زاد بعطاه الى اشلهبّت سنينه
أما في مدح الأمير بدر بن هايف الفغم فيقول شاعرنا:
يا راكب اللي يوم احليّ انزعاجه
معصير صيفٍ مقتفيه الرشاشي
أنا أذكر الله عنه يسبق عجاجه
ليا ناشه السابق برجله نواشي
امكلفه راعيه من كل حاجه
ما وقفه بين السرى بالقراشي
عليه من يقطع فجوج الزراجه
اليا زمّت الدشه وراها دشاشي
ملفاك بيت اللي سفيرٍ احجاجه
البن يحمس والمراكي قماشي
شيخٍ لربعه ما يحسب خراجه
هداج تفرح به كبودٍ عطاشي
يقرى الضيوف بناظره وانبلاجه
وسمٍ معفى للقلوب الغشاشي
الضيف عنده ما يكدر مزاجه
متكلفه عقب العشاء بالفراشي
ويقول شاعرنا معبراً عن أحد المواقف التي مرت به مسنداً على الأمير سعود بن هايف الفغم:
يا سعود أنا ما سكت اليا شفت ميلاح
والصمت حكمه يا مروي الرهيفي
ولاني على زين التماثيل شحاح
لاشك ماني بالمجالس خفيفي
ولشاعرنا هذا البيت:
لعل قمرٍ ما يوقي عن الحيف
تصبح مبانيه الطوال مهدومه
من قصيدة وجهها شاعرنا إلى الشاعر الكبير محمد بن خلف الخس المطيري . . متشوقاً بها لحياة البادية نختار منها الأبيات الآتية:
يازين شب النار بارضٍ بياحي
والزول يزمي لي على مد شوفي
والبيت مبني والرعايا ضواحي
وانته تمشى مع نبات الحروفي
اخير من ذبحٍ بليا سلاحي
بقبورت الحيين مثل الضعوفي
ببيوتنا مثل الدجاج المداحي
مغير يم السوفي ناخذ ونوفي
يابو خلف ما من تجدد مراحي
متشفقاً عقب الشداد الردوفي
يا بو خلف صاحي ولاني بصاحي
بس اتلفت مثل راس الخروفي
خروفٍ ادلم ما يعرف المتاحي
وراعيه جابرته عليه الظروفي
ابكي على وقتٍ حضرته وراحي
اتلاه يامحمد زمان الكسوفي
فقد أجابه الشاعر الكبير محمد خلف الخس بقصيدة طويلة نذكر منها:
يا سحلي العواي ما نته مباحي
ياللي تقول انك حوالا صفوقي
الفرق واضح للسنين امتراحي
قدام اجي وانته تغير وتحوفي
لاشك معي انته تحب المزاحي
وزلتك عندي يالسنافي تطوفي
وتقول انا يالخس ماني بصاحي
واقول ما انت بصاحيٍ ومهروفي
ياللي تبي وقتٍ له اسنين ماحي
يوم القبايل بين أمانٍ وخوفي
ومن قصائد شاعرنا الغزلية نختار هذه الأبيات:
الزين شفته بين جبه . . ومشهور
اليا شافها قلب الولع عشقها
ما ليمت زينٍ تلاصيف وخصور
نورٍ على نور من الله خلقها
العين عين اللي على الجول مسعور
اما قضبها درج والا لحقها
والنهد مزموم على الصدر مذبور
رمانةٍ مانحت عنها ورقها
وليا ضحك باللي تقع وقع شختور
من مزنةٍ ترعد ويبرق شنقها
توفي شاعرنا في عام 1410ه وقد رثاه العديد من الشعراء ومن ضمنهم الشاعر المعروف سليمان العويس حيث يقول من قصيدة طويلة نذكر منها هذه الأبيات:
نبي نعز مطير في شاعر مطير
في سحلي العواي من عقب موته
لو ماعلى باق الرجاجيل تقصير
لكن طريقه نادر اللي يفوته
بهل النخاسه شهر العود تشهير
يطلع حقوقه لو هي ببطن حوته
واليا تكلم فجر القاع تفجير
قارٍ عقارب نجد مع عنكبوته
رحم الله شاعرنا وأموات المسلمين . . . وإلى اللقاء مع شاعر آخر . . ولكم تحياتي . .
بريدة