سلطان السعد

اغيب عن فكري من الحزن يومين
وابكي وازيد من البكى فالمراقيب
باسباب وعكة سيدي تذرف العين
وفرحت يوم انه خرج منبع الطيب
ونذرت يوم انه شفي صوم شهرين
يالله ياللي تعلم الجهر والغيب
ياللي جميع الخلق بك مستعينين
تحفظ لنا سلطان ابا العز والطيب
واهل الوفا حكامنا دوم وافين
ما همهم من زيفوا بالاكاذيب
صيدٍ لما يجري من الغدر صاحين
والشلة اللي هاجس الفكر تخريب
ما هم على الفطرة ولا هم على الدين
اللي يفجّر في الوطن دايم يخيب
والكل للي يفعل الخصم واعين
في ساعة فيها تجاب المطاليب
فجّر وهز المرضعة والمصلين
ونوى يفجّر بالحرم مابها ريب
لكن رب البيت اخزى الشياطين
يالله تعذب من نوى الدين تعذيب
المجرمين اللي مع الغرب رابين
حنا نأدبهم مع الوقت تأديب
نحمي الوطن ياذيب من كل عبثين
ونفدي الوطن يا امير من دون تدريب
حنا حماته والله انا مفادين
حنا حماة الدين ما فيه تجنيب
والله مادمنا على الارض حيين
نفدي الوطن نفدي الحرم والمعازيب
حكامنا آل سعود بالشرع ماشين
الشرع باسلوبه يفوق الأساليب
وشعارنا فالوقت نخله وسيفين
وحنا ركبنا فوق حرش العراقيب
وعشنا على اوقات الشقى ومتحدين
واليوم جا وقت اختلاف المذاهيب
وقت يلوّن ياهل العز تلوين
اصل العرب حنا وخضنا التجاريب
حكامنا والشعب دوم متصافين
والأمن في حكم الفهد يالاصاحيب
والحكم شرع الله وللدين داعين
غير اهل العوجا رجال الاصاعيب
اخوان نوره كل ابوهم سلاطين
ما غيرهم والله يجي في المناصيب
كفو المناصب فيهم الشعب راضين
اشبال اخو نوره عطيب المخاليب
نسله فهد والله فهد ما له اسمين
واخوه عبدالله كثير المكاسيب
والنايب الثاني ضديد المعادين
والله لو انسخ يابو خالد مكاتيب
وازيدها بالشعر عشرة دواوين
ما ينحصي جودك ولا فيه تقريب
ما حدٍ فعل فعلك من الجسر للصين
يا قايد القوة نهار المحاريب
قدمك يدقون التحية ملايين
سلطان سلطان السعد والمواجيب
لايا ملاذ المحتدي والمعاقين
سلطان في بيته يرد التراحيب
ويسدّد الدين ويفك المساجين
جزّام في فعله وفي رايه مصيب
ومن حكمته فاهم جميع القوانين
ينفق بكف وكف فيها المحاديب
هاك السيوف اللي تخيف البغيضين
وسميتك اسم تشتريه المناديب
عز الجزيرة ريف كل المساكين
واعداد ما تطلع لنا الشمس وتغيب
صلّوا على المختار ختم النبيين
سعود محمد ناصر عقيل المقاطي