حلول اللغز

كتب الاسبوع الماضي الشاعر محمد عبدالكريم الغزي لغزا يقول فيه:
شفت لي بنتين ممشاهن جميع
فوق بنت ما تحفظ اسرارها
دربهن محدود لكنه وسيع
يتعبن لو تستمر امطارها
***
شفت لي لغز يبا حل رفيع
نرفعه فوق النجوم وجارها
من محمد راعي اللغز البديع
مثل روضة فاح ريح ازهارها
والحلول اليا بغاها ما تضيع
عند رجال يقدر دارها
واضحة مثل الزجاجة باللميع
كل ما تمطر تبيح اسرارها
محمد المويعزي - بريدة
***
مرحبا يا صاحب البال الوسيع
اعشق الالغاز واللي اختارها
مساحة الزجاج للسايق تطيع
من يوم شاف الغيم داس ازرارها
نايل الخيال الشراري
القريات العيساوية
***
برق فوق طويق شفناله لميع
جاء على الزلفي وزاد انوارها
انتثر سيله وفيض كل ريع
من يمين المجمعة وايسارها
كل مساحة تراها ما تضيع
يا ولد عبدالكريم ادوارها
فهد عبدالعزيز الفهد
حوطة بني تميم
***
اشهد انك جبتها فوق الرفيع
والحرار تعود يم اوكارها
صفحتك ترقى وحاسدها صريع
عشت بفكارك جنيت اثمارها
والمطر يا محمد الغزي يضيع
كل مساحة تلف يسارها
سعود العثمان
تمير
***
الدهر خلوه ومشوا للربيع
للفياض اللي تفوح ازهارها
الجزيرة يا هل الذوق الرفيع
الله اللي رافع مقدارها
تقفي من السوق ما فيها رجيع
انفرد تحريرها باخيارها
والمطر لو هل يا محمد سريع
كل مساحة بدا مشوارها
(الايمن) الزلفي
***
يا مرحبا ماهب نسناس الربيع
على الفيافي وانحنى نوارها
يا مرحبا باللي بدع لغز بديع
يا مرحبا به عد وبل امطارها
وبناتك اللي لا مشن يمشن جميع
على القزازة يمسحن غبارها
خليل إبراهيم الشبرمي
الرياض
***
يمحمد الغزي هلا بك والجميع
دون الرفاقه ما تسد اعذارها
لو كنت جار وبيننا خط سريع
ارسلت لك عبر التراث اخبارها
مساحتين يجددن لون اللميع
ماهن يملن لو تطول اسفارها
فهد بن عقيل الطويان
بريدة
****
لاح برق بالدجا وقت الربيع
والسحايب مرزمة بعبارها
بالجزيرة صدري الضايق وسيع
يوم جتنا بالعلوم اخبارها
يا محمد لو تبي تشري نبيع
نركب الكايد ونضرم نارها
لا ركبت بموترك خط سريع
وامطرت عليك يمسح غبارها
جارالله محمد الغزي
الزلفي
***
يا محمد الغزي ترى لغزك رفيع
وحنا عرفنا الحل ونجيب اخبارها
مساحات السيارة ونعم المنيع
تزيل كثر الماء وتبين انظارها
الوليد بن سعيد شحيتان العمار
الرزيقية الافلاج
***
يوم ابن غزي بدع لغز بديع
جبت حله ثم نشرت اخبارها
البنات بدبرتك دايم تطيع
ما عصتكم ليلمست زرارها
دايم تمسح ولا تلقا شفيع
وبالمطر والشمس قصر اعمارها
فهد بن سعود الدغيثر
***
رمعت لي رمعة لا ظني تضيع
الصح والمعقول رمز شعارها
الحر يفهمها على الطاير سريع
تكفيه إشارة ما يبي تكرارها
وانا فهمت اللغز بالمعنى الوقيع
مساحتين والمواتر دارها
حماد جزاء الحنيني
***
سلام للي بالقوافي ما يضيع
محمد كريم الروح هاك اخبارها
يا مرحبا بالتوم لامشين جميع
تمسح قزاز عقب هل امطارها
مساحة الموتر عقب حسن الصنيع
تخرب ولو هي غالية اسعارها