حلول اللغز

نشرنا في عدد الاسبوع الماضي لغزا كتبه الشاعر خلف الأسيد الشراري وكانه نصه :
قصدي اشغل وسيع العرف واحايله
واستثيره بلغزي عقب فترة ركود
واسأله ويش رجل شايل شايله
شايل اللي تشيله يوم ينوي يعود
روعة مع ميوله للسما مايله
شالته بالنزول وشالته بالصعود
وقد جاءت الحلول الصحيحة
والمكتملة شعريا كما يلي:
يا ابو مزهر نعرفك تكسب الطايله
وعادتك لا نشرت اللغز حله يكود
شاردات المعاني جزلها نايله
بالجبال المنيفه والسهل والنفود
والمظلي حياته لو نجا زايله
جل حي هو اللي دايم بالوجود
بركات نسيم الشراري - طبرجل
شفت لغز الجزيرة عاش من قايله
شاعر بالمعاني جاد دايم يجود
المظلة تشال وعكس هي شايله
شالت اللي شجيع وعن بلاده يذود
سعد بن صنهات السهلي
الدرعية
مرحبا يا خلف ترحيبة طايله
في تراث الجزيرة نرسله للحدود
المعاني نصفه صفة هايله
لا سمح وقتنا تسهل علينا الردود
من تعرض خطرها بالسقوط آيله
المظلي حملها واشهد انه صمود
خالد بن سليمان الجريش
الرياض
القصيدة تزين وتنتشي هايله
كنها ورد جوري بين كل الورود
صاغها لغز من هو كاسب الطايلة
لغز وافي خصايل بالفضا له وجود
ينتمي للشجاعة نوطها نايله
ما يهاب المخاطر دايم الها يرود
نايف محمد الاسيد
القريات
نحلل القاف بالتفكير ونحايله
والله اللي يحل عقود كل معقود
ونختصر بالجواب ونقصر الطايله
ونهدي الشاعر الموهوب باقه ورود
ونشهد ان )المظلي( شايل شايله
بالمظلة قفز من حاملات الجنود
خليل الشبرمي
الرياض
يا سلامي على اهل الجود والطايله
عد وبل تحدر من خياله يجود
لغزكم يالشراري كل ما احايله
قام يقدح على صم الحجر بالزنود
كان ماهي المظلة للوطى مايله
ليا قذفها المظلي والاوادم شهود
خليف الحربي
الرياض
صفحة تراث والله هايله هايله
بالتميز تباهى رغم انف الحسود
بعد ذا مرحبا باللغز يا قايله
عد نبت الفياض وعد رمل النفود
و«المظلى» بفعله يكسب الطايله
يا خلف «بالمظلة» بارع بالصمود
عطا الله بن سليمان العطا الله
الزلفي
برق اخيله وبرق اصد ما خايله
سحب تمطر وسحب بس برق ورعود
جعل ديرة خلف طول السنة سايله
حيث نبته يزيل من الكبود اللهود
جيد لغزكم وجود منه قايله
المظله ولا يحتاج نحضر شهود
ناصر المسيميري
مرحبا يا خلف يا راعي الطايله
مرحبا بك عد ما يرز من الرعود
الرجل ينعرف بافعاله الهايله
المظلى من اشبال تحرس الحدود
هاك حلي نبثه بالنداء قايله
قبل نشره وقبل ما يجن الردود
محمد البوجان الشراري
الحديثة
مرحبا بالذي لغزه رقى الطايله
عد ما هلت المزنه وفاح الورود
المظلي نزل ما حالته حايله
مدرب بالمظلة دايم في صمود
علي بن حمد الحمد
الرياض
عد مزن وبرقه كل يخايله
واستهليت ديميه بليا رعود
مستوى اللغز عالي بمستوى قايله
بمستوى الصفحة اللي تزرع اجمل ورود
كان فكري قرا أفكار من حايله
)المظلي( يجيه بصادقات الردود
عفاف
الجوف
في سحاب الشمال السيل ونخايله
وفي حدود الشمال الجود ماله حدود
كل مازادت الدنيا فهي زايله
والجمل في غيابه شال حمله قعود
بالمظلة لفانا راعي الطايله
خدمة للوطن والدين وآل سعود
محمد عبدالكريم الغزي
الزلفي
يالشراري افكارك دايم هايله
ومن عرف كيف ينزل ما بلش بالصعود
مهما تعبر بلغزك يا خلف طايله
الاسد ما يباري غير مثله اسود
والمظلي ما همه برد او قايله
بالسما لو تعلا اخرتها يعود
زايد ونيس العماوي الحازمي
طريف
حل لغز الجزيرة حاجة هايله
حاجة ما يطيقه غير شبل الاسود
للمظلي مظلة فوقنا نخايله
لمن تعود عليها سهلة ما تكود
عبدية الشمري
حائل
بعض الالغاز صعب وصعبه قايله
والله اللي يحل مروبعات العقود
يوم افكر بحل اللغز واحايله
المظله ويحملها شجيع الجنود
شالها في الصعود القمة الهايله
وشالته في نزوله صوب الارض بركود
مسعف ناهس العتيبي
مهد الذهب
يا خلف خذ جواب اللغز يا سايله
وانشري يالجزيرة ما لفى من ردود
بيض الله وجه اللي لنا قايله
قال لغزه بعد ما اعطاه كل الجهود
المظلي كما صقر السماء تخايله
والمظلي بروحه حال دون الحدود
عبدالله بن فايز الشهري
الرياض
لاح ضوح البروق بمزنه سايله
وفاح ريح الخزامى عقب ذعذاع نود
وانتهض معه فكري وطالت الطايلة
وراح يسبح بجو لا بحر لا نفود
)بالمظلة( نزل في ساحة عادله
ولو تكود بلغزك ما علينا يكود
عبدالله بن عبدالعزيز الفهد
الروابع تتابع بالعدد هايله
بالمجال الوسيع ولا يحده حدود
حل لغز الشراري كني اخايله
يوم يقفز من السي ون جمع الجنود
مناحي مقبل الحربي
الجبيل الصناعية
لغزكم يالشراري تحفه هايله
ليت من هو يشيله مع جنود السعود
مستعد يشيله حموة القايله
لو هدير المدافع مثل حس الرعود
افتخر يالمظلي والذي شايله
شال من هي تشيله حين ينوي يعود
حجي بن سليمان الحجي
الأحساء
معك يا اللي بدعت القاف يا قايله
ان حدرت السهل ولا رقيت السنود
لغزكم بعد شفته فكرته هايله
ودي ارسم على القيفان بعض الورود
المظلي شجاع بالفضا نخايله
في نزول المظلة ما تشيل الشرود
محمد علي السالمي
رفحاء
يالتراث القصايد كلها هايله
كل يوم تطور والمعاني تزود
قمت افكر بحل اللغز واخايله
اتفكر واجول بخاطري ثم اعود
قلت هذي )مظله( بالسما شايله
حي من هو ركبها واشهد انه صمود
علي رشيد الرشيد
رياض الخبراء
شهد انك حكمت اللغز يا قايله
ذي شهادة صريحة قالها لك سعود
ما جهلت المظلي راعي الطايله
ذا صحيح الاجابة والعوارف شهود
سعود سليمان الحربي
الرياض
بارق من زمان العام انا اخايله
كل ما قلت: هل الغيث جابه صدود
غاب له وقت .. والدنيا بعد زايله
وغير وجه الولي ما دايم بالوجود
والهواء قوته لو شفتها هايله
تحتمل للمظلي يالشراري وزود
فهد الجروان
الزلفي
يفهم اللغز راعي اللغز يا قايله
يستحق الزعامة لغز يرقى سنود
وللمظلة مظلي والشرف نايله
ما يجيبه جبان ولا يجيبه شرود
سعود بن جازي الحربي
الرياض
مرحبا عد نبت الفيضة السايلة
يوم سالت وفاضت من عبير الورود
والثنا عندنا يستاهله نايله
وكلنا للشراري بالتميز شهود
شفت انا قبل مدة حزة القايلة
)عسكري بالمظلة( نازل في ركود
محمد بن حمد البدر