مطلق فيحان الصوينع العتيبي

مرثية

مرثية في صاحب السمو الملكي الأمير سلطان بن عبدالعزيز - رحمه الله -
مات الزعيم الرمز والعدل والفخر
لكن ما ماتت على اثره وسايله
اللي رسمها للمخاليق منهج
دايم على كل المقاييس طايله
وسايل ما كنها إلا الشخصه
فعله ومنهاجه ومبدا جزايله
والحب في قلبه كما النبع صافي
بين إواضح في جبينه دلايله
عطفه ومداته ومنطق السانه
وكلماته اللي حاملات مخايله
سحب تغيث الناس في كل ناحيه
كلٍ على ما احتاج يشكر فضايله
إنسان في كسب القلوب وحبها
يرفع به الهامة ولله سايله
اعطوه صدق الحب والعهد والوفاء
وتبادله معهم إبعالي مثايله
واعطاهم الحب العميق المجرب
يشبه الوديانٍ من الوسم سايله
تزهر بنبت الخير في كل جانب
والناس من خيره على الدوم كايله
وياما عطى واعطى وزاد البريره
مثل الحيا يتبع تواليه اوايله
الله من شخص اليا جاه عاني
يعطيه ما يملك ويرفى خمايله
وياما قضى حاجات ناسٍ كثيره
وفرج إهموم اللي إهمومه إتكايله
لاجاه مضهودٍ ونفسه كسيره
ما وصله الا ناشفات بلايله
يسقيه ويصدر ونفسه رويه
يجبر كسر نفسه ويشفي غلايله
شخصية فذة ويصعب وصفها
ينبيك عن شخصه مكارم بذايله
إنسان تاسرنا مواقف إخصاله
انظر الهاك الطفل وشلون شايله
قال أنا حبك قال وانا بحبك
وضمه على صدره وعانق نحايله
وصدّر له إعلاجٍ سريعٍ وشامل
والله شفى جسمه وجدد سمايله
وغيره وغيره للمخاليق ظاهر
واللي خفى ما هوب للناس قايله
العبرة ابسلطان سلطان واحد
وعلى متونه شال مليون عايله
والجانب الاخر سمات البطولة
ينطح غريمه نطح ما انوى إيحايله
وعند المواقف والملمات وهلها
ياقف لها وقفات تثبت صمايله
عزمه قوي ما ينثني في المواجه
يردع وجوه القوم لاجات صايله
ساسه ومغراسه على ثابت الصفا
راسي ولا يقبل إبحقه بدايله
لو غاب ما غابت فعوله عن الملا
محاسنه تبقى ولا هي بزايله
الخلق تدعي له وترفع إيديها
إبدمعٍ على اللبات تذرف همايله
يارب تجعل له إبجنتك مثوى
إبفردوسك الأعلى وسيعه نزايله
واجبر عزا شعبه والاسرة جميعها
الاسرة اللي دايم الدوم نايله
للعز والأمجاد والجود والرضا
سليل ورّثها إلحاضر سلايله
من الدولة الاولى إلدولة معزي
وحدّ أوحدّها أوضح رسايله
أرسى قواعدها إبفعله أوعزها
لاجدادنا واليوم نجني جمايله
يا الله عسى آل سعود حصن وذخيرة
ملجا لمن شبت إبجسمه فتايله
الدوحة اللي ثابتات إجذورها
وفروعها عليا ولا هي إبمايله