يا رب ترحم فاعل الخير سلطان

بحسناك يا خلاّق آدم من الطين
يا رب تجعل منزله عند رضوان
يا خالق المخلوق يا ناصر الدين
يا رب تجعل له مع الحور مسكان
في جنة الفردوس يسكن بعلّين
في جاه من دينه ختم كل الأديان
المصطفى الهادي أمام المصلين
ندعوك يامن للمخاليق رحمن
ترحم فقيد الشعب يارب يا معين
سلطان فقده عم شعبه بالأحزان
جميعهم من جايح الحزن باكين
سلطان مع لطفه للأخصام مالان
لطيف بالصاحب وضد العنيدين
سلطان يذكر دوم في فعل الأحسان
أبو اليتامى والضعوف المساكين
سلطان ريف الجار به دين وأيمان
دوم ايتهجد والمخاليق غافين
سلطان سلطان السعد طير حوران
إلى شهل تلبد جميع الشياهين
سلطان نال الجاه والقدر والشان
وملك قلوب الناس في فعله الزين
سلطان يعطي دوم في سر وأعلان
دايم بفعل الخير ينفق ملايين
سلطان كفّه بالصخى تقل هتان
فيه الكرم والعطف واللطف واللّين
سلطان ريف اللي من القل حيران
عز الوفود اليا تنصّوه عانين
سلطان طيبه له دلايل وبرهان
فعايله ما هي هقاوي وتخمين
سلطان للمعروف والطيب عنوان
كل الخلايق بالكرم له مقرّين
سلطان أبو خالد سلايل كحيلان
منشاه من صلب الملوك العريبين
سلطان من عقبه عزانا له أخوان
وأنجال من صلب الفقيدة سلاطين
عقبه عوضنا في صناديد مرخان
نقوة أسود وبالحرايب عطيبين
آل السعود اللي على الحق ميزان
نسل الملوك بمنهج الشرع ماشين
عاش الملك للشعب ملجأ ومزبان
هو ذخرنا لا صار وجه الزمن شين
وأخوانه اللي بالملمات شجعان
وحكامنا الأبطال عوق المعادين
عبدالله بن عبار العنزي