أبكي يزيد وحرق عيوني البكى

ليس أصعب ولا أمر أن يفقد الإنسان أعز وأغلى ما عنده وهذه مشاعر في رثاء ابني يزيد رحمه الله واسكنه فسيح جناته
عزاه يا دموعاً من العين سايله
والحزن في قلبي من اسبوع شايله
اذرف كثير الدمع من حر لوعتي
والحزن في قلبي يزوره وطايله
ابكي يزيد وحرق عيوني البكى
فقده يا بو سلطان بالقلب هايله
هم يراودني وهم اراوده
وهم يصايلني وهم اصايله
حزن يولع في ضميري ويبتدي
الحزن في قلبي مشعل فتايله
ليا ذكرته زاد همي وحزني
ولاشفت بالجوال صفحة رسايله
لاشفت انا ثوبه ودرجه ومكتبه
ولاشفت بالدولاب صفة فنايله
ترجع لي احزاني وتذرف مدامعي
ودموع عيني فوق الاوجان مايله
اللي يعاملني بحبه وعطفه
وليا ومرته طاع ما كنت قايله
طبع حنون ولا مرته يطيعني
يزيد بين الناس ما القى مثايله
من عيني اغلى لا من نور مهجتي
فقدت من كانت عيوني تخايله
يالحزن في غيبتك مبطيت عنا
تيجي وكثير الناس يالحزن طايله
لو ينفدى بالروح والله فديته
مير القبر اخفاه واخفى نثايله
قالوا يابو فيصل تحمل مصيبتك
دنياك هذه يا ابن الاجواد زايله
كل من عليها فان لو طال عمره
لابد يوم ما تقفي رحايله
ودنياي بعده ما عليها حسوفه
زهد فيها بكل صبح وقايله
راضي بحكم الله وراضي بدبرته
وما دبر المولى على العبد جايله
عساه بالجنة ويقطف ثمارها
في رحمة المعبود جزله فضايله
يرحمك رب البيت هو رافع السما
ما خاب عبد رب الاكوان سايله
يجزاك رب البيت بعطفه وجنته
جنة نعيم فيها الاغصان مايله