زيد: افزع لقلبن تالي الوقت محتار شبيب: أبشر بفزعة منصح جاك مغوار

من شعر المراسلات....

من دولة الكويت الشقيقة يشاركنا في هذا العدد شاعران معروفان هما الشاعر زيد المطيري والزميل الشاعر والصحفي المخضرم شبيب غزاي المطيري في قصيدتين متبادلتين الأولى كتبها الشاعر زيد المطيري .. ويقول فيها:
دار الهوى والفكر مع دورته دار
يهتز عرش الفكر مع كل نودي
قامت تصافق بي من يمين ويسار
كنه براسي حرب بين الجنودي
يوم اعتليت بكورها سقت الأفكار
منظوم فكري مثل نظم العقودي
ارسلتها تربع على كل مضمار
ورديتها والعلم فيها معقودي
علم الهوى ثابت ولو صار ما صار
اجحد وانا أدري ما نفعني جحودي
يومن كميت الحب عن بعض الأشرار
أخاف يلحقني كلام الحسودي
ناسن تلوم الناس في كل مشوار
بحسابها المسلم حساب اليهودي
يا بو فهد وانته من الربع الاخيار
سيفن مجرب من عيال الفهودي
لا يا ولد غزاي يا نسل الأحرار
ياللي مواقفكم عليها شهودي
افزع لقلبن تالي الوقت محتار
محتار في هاك الغزال الشردوي
لا لا تعذر في تصاريف الأقدار
أبيك تبذلي جميع الجهودي
أشكي عليك من الهوى سر وجهار
واشكي عليك افراق ظبي النفودي
اللي جماله ما توفيه الأشعار
الوصف فيها فاق كل الحدودي
قفا وخلاني مثل زابن الغار
اسبح بدمي واشتكي من قيودي
كثر علي الحلف ماخون الأسرار
لكن عقب الحلف خان العهودي
عقبه تبدل صافي الجو بغبار
واليا شربنا ما نبل الكبودي
من حرتن بالجوف وش لاهب النار
النار تطفى مير هذي تزودي
وان كان (غاده) تابعت كل الأخبار
قولوا لها عودي علي العهد عودي
زيد المطيري
وهذا رد الزميل الشاعر شبيب غزاي المطيري المشرف على الأدب الشعبي بمجلة المجالس الكويتية:
جتني رساله سكرت كل معبار
ما عاد فيها يا جماعه رقودي
من شاعرٍ جزل المعاني وبيطار
من قوها باحت جميع السدودي
قمت أتذكر ما مضالي من أعمار
كني على ذيك الليال محدودي
يوم الهوى في داخل القلب سمّار
كنه منظم في جميع البنودي
كنه مسيّج في قوانين وأسوار
متقلبٍ ما بين نزل.. وصعودي
عانيت لين إني تشربت الأمرار
وكثرت على قلب المعنى لهودي
والناس ما تعطي من الخير قنطار
يا ما حسدتني قطفتي للورودي
يا زيد جاك العلم تكرار تكرار
والله ما ذخر شيء وأرسل وفودي
أبشر بفزعة منصح جاك مغوار
أقدح شرار بفزعتي من زنودي
ما به مجال نطق الأعذار بعذار
تلزمني الفزعة لنخوة بدودي
أببذل المجهود وأفزع الجار
ولاني مجرح بالأصابع خدودي
يا زيد يا نسل المشاكيل الأجرار
يا من مواقفهم تفك العضودي
الحب ما يعرف صغيرين وكبار
فعايله يا زيد صعبه تكودي
لا شك أنا بنشدك عن كل الأضرار
ماني بخابر زيد.. عجل وهبودي
وش سبب الفرقا على غير معيار
عطني مواثيقٍ وترقا سنودي
حتى ليامني نويته بمسفار
القاه صادق قلب ما هو حقودي
وتشرب عقب فرقاه من حلو الأنهار
والصبر مفتاح الفرج ومحمودي
وإن كان غاده تستمع عبر الأقمار
تكفين ردي يا المهاة العنودي