قصيدة للشاعر عايض بن هداف بن غيده

عند الخوي ياطيب الساس والفال
لا ترتخي لمكّسرين العضودي
ولا تستمع به حكي واشي وعذال
تصبح ضحية مخلفين الوعودي
واليا عمدت اعمد من القوم خيال
ولا تنطح السيف الحدب بالعمودي
يلويك بالحجه منافق ودجال
وتلقى الوطى عقب العلا و السنودي
واليا ضربت اوجع على كل الاشكال
لوكان تاصل حد قدح الزنودي
واليا نقلت اخذ اشقرً يشرح البال
ولا تكاثر فيه عد النقودي
المال يفنى لكن الصيت مازال
من عهد إرم وعصور عاد وثمودي
واليا لقيت اللي مع الخلق مرسال
خلك على سدك قطيب وجحودي
لو حايلك بالغش ماهوب محتال
انكان لك عزمً يفض الحيودي
واضحك لبو ضحكه ليا جاك فلال
لو كان همك فالضماير حشودي
خله يظن انك على طيّب الحال
ويموت بالحسرات قلب الحسودي
واشتر هوى نفسك على كل الاحوال
واجعل لنفسك من هواها حدودي
وادر الخطا لا جاك من طيب الخال
انكان فعله من قديم امحمودي
واليا تمادى عرّضه لاشهب اللال
لو هو خشيرك في جميع العدودي
قد قيل ما يصبر على الهون رجّال
الا ردّي الرابعه والجدودي
واليا لقيت اللي على الناس عيّال
ابد الغوى لو كان منت امحدودي
لا شافك معزّم وصادق وصمال
انحاش من وجه الشجاع الشرودي
لا يرهقك باللجلجه والتفتال
القذع طبً للبعير الهبودي
واليا طلبت الحق ثبّت بمعدال
واليا قضيت فخل عندك شهودي
واختر قبيلً للثقيلات شيّال
لا تحتزم بضعيف ماله زنودي
وان طِلب منك الحق ساير ولو مال
من يجحد حقوق الرجال معقودي
وان مارضيت الفرض ناقل بالامثال
ويرضيك غيره قبل قدح الفرودي
لا خير في عرفً يوردك الاهوال
وعليك بذنوب الليالي يعودي
تلقح بشرًّ تكترب منه الابطال
وحملً رغى منه الجمل والقعودي
وخط الورق حجه على الارض والمال
الهرج ينقص غصب ولا يزودي
هذي وصايا بوي والحق ينقال
من بوه جعله في جنان الخلودي
عودً قضى عمره على الحف سلّال
بأمات تاجً دون حده يذودي
الشاعر : عايض بن هداف بن عايض بن غيده
قطر