جزيل العطا

انا ليش احسب الوقت وابكي على اللي فات
وانا ليش ازيد بداخل القلب الأوجاعي
وانا في حياتي لو طالت بي المدات
محدد بها ساعة دخولي ومطلاعي
وانا ليش الوم الحظ والحقه شرهات
ليا اخطيت بعض احيان عن درب الاسناعي
وانا عارفٍ ربي محدد لي القسمات
وكلٍ ومقسومه على كل الأوضاعي
ولو تكثر الروحه ولو تكثر الجيات
يصيب النصيب بلا مراحٍ ومرجاعي
وشرور القدر لو ضدها أكثِّر الفزعات
تجيني ولا ضد المقادير فزّاعي
ولو البشر تكره لي الخير والنفعات
تجي قسمتي لو اكثر الخلق ما طاعي
يا دنيا ما تسوين التحسف ولا الحسرات
ولو شاف لك بعض المخاليق منفاعي
ولو بك يزين الوقت لحظه من اللحظات
الك كيةٍ تسطي وراء حدب الاضلاعي
انا منك في وجه الذي يدفع الكربات
كريمٍ وهو للشرور الاقدار مناعي
طلبته بجاهه يفرج الهم والضيقات
ورجيته يجيب برحمته دعوة الداعي
انا في ذراه بحزةً تبعث الاموات
نهارٍ به اتهمل الرعيه بلا راعي
يكفر لنا السيّه ويجزَّل لنا الحسنات
جزيل العطا اللي له سجودي ومركاعي
وعسى الله يكافينا شرور الدهر لاجات
وما يكتبه رب المخاليق ما ضاعي