طاهر الأردان

في الفقيد الغالي الراحل الشيخ عبدالرحمن بن سليمان آل عبيد (ابومحمد) من اعيان مدينة الرياض جار عزيز ورجل فاضل حسن الخلق جم التواضع محبوب من معارفه وجيرانه، انتقل الى جوار ربه فجر يوم الاحد 2/11/1423ه عن 72 عاما رحمه الله رحمة واسعة وصلي عليه عصر ذلك اليوم ودفن في مقابر المنصورية بالرياض غفر الله له وألهم أهله وأبناءه الأفاضل وبناته الفاضلات وذويه ومحبيه الصبر والسلوان:
فقدناك يا جار عزيز على الجيران
نحبه وكل الربْع صدقٍ يحبونه
فقدناك يا (ابن عبيد) ياطاهر الأردان
أقوله وكل اللي تعرفه يقولونه
فقدناك يا شيخ حبيب وعفيف لسان
خبر فقدتك كنّ اطرف الكبد مطعونه
ويفقدك ذاك المسجد وباقي الأركان
نعدك من المسجد ومن ثابت ركونه
إلى جا القدر ما فاد حاكم ولا سلطان
ولا أية طبيب ولا علاج يجيبونه
حلالات لو هو ينفدى باعظم الأثمان
نسوقه وندفع زود ونحول من دونه
وحلالات لو هو يدفع بسيف والاسنان
ندافع ولو هو ينفدى الريع يفدونه
أسوق العزا (لمحمد) وباقي الاخوان
عياله مثل ممشاه بالطيب يمشونه
أواليد نعم رجال وافين بالميزان
يحبون فعل الخير شكله ومضمونه
أبوكم سبق للخير بضيافة الرحمان
وعند الله ويبشر بفوز تمنّونه
أنا أشهد وغيري يشهد إنه قوي إيمان
على درب هادي الخلق وخطاه مامونه
عسى جنة الفردوس له مسرح وميدان
وربي يحقق ما رجا فيه وظنونه
يقدر كبير السن ويمازح الشبان
لطيف وظريف ومنطقه ما يملونه
وله هيبة مثل اشقر الريش والجنحان
وعليه الرياض وناسها حق يبكونه
عسى الله يلهمنا الصبر واحسن السلوان
ونطري مع اللي باحسن الذكر يطرونه
مع دعائي له بالرحمة وأن يكرم الله وفادته وينزله منازل الأبرار (أمين)
(*) جاره وصديقه ومحبه
آل عاصم قحطان أبو عبدالسلام الرياض