نعم سعودي وافتخر

وأرفع الراس
لن جات للطيبة وذكر الفعايل
إن قلت نخوة.. مرجلة.. طيبة وناس
للعز في دار النشامى دلايل
دارٍ رفعها للعلا طيب الساس
عبدالعزيز اللي عدل كل مايل
وحد وطن.. وقلوب وأشكال وأجناس
بالدين والحكمة وضرب السلايل
قدم مهرها ما دفع در وألماس
قدم رقاب حمر وقت الصمايل
شد المحازم وامتطى خير الأفراس
وطاعت له البيدا زبون الأصايل
وزرفل بجيش فزعته كل قرناس
دليلة الفرسان واف الخصايل
بهمة الشجعان لباسة الطاس
حقق مراده بالفزوع القلايل
وقال الرياض لها حمية وعباس
ويعاب قولٍ ما يجي له فعايل
وقاد القروم بسهل.. وجبال.. وأطعاس
ما همهم برد.. وسموم.. وقوايل
مذهبهم التقوى والإصرار والباس
صدق الرجال اللي تعز القبائل
طلاب حق وفيه عزة ونوماس
وغير العدل والحق ما له بدايل
إيسابق الشمس المغيبة والأنفاس
على عذا نجد وعشيب الخمايل
وتابع مسيره سرمدي الليل وأدماس
سبار قومه يعتلي كل طايل
ما بين تسبيحة وتهليل وإحساس
إنه على ميعاد شقراء الجدايل
تباشرت به ديرته عقب الأرماس
عقب الهجاد وميبسين البلايل
رد الفقيدة واندحر كل خناس
وأقفى معذر كل طامع وعايل
وثبت قواعد دولته وأمن الناس
بحكم الشريعة واعتدل كل مايل
وساروا على نهجه عيال لهم ساس
ساسٍ عزيز ومسند الساس وايل
نعم الحمولة فعلهم.. حق.. نبراس
تشهد لهم بالطيب روس الحمايل
لا ثارت الهيجاء والأرياق يباس
سوءٍ على من دق هجسه حبايل
سوءٍ على حاسد ومبغض وبلاس
وريف يزوف برايحات المخايل
ريفٍ يطيب لكل عاني وعساس
ومزبن لمن حلت عليه النزايل
الله يعز الحكم ويذل الأنجاس
وتبقى سلالة طيبين السلايل
اللي بهم يبقى الفخر رافع الراس
آل السعود إن صار ذكر وفعايل