قلبه مثل داره للاجواد منزال *** ما حط بين الشعب والحكم حايل

قل للقوافي في سماء الشعر تجتال
تروي شغفها من عيون المثايل
الدرب يطربها على كل الاحوال
يوم المدى طيب وواسع وطايل
في خاطر الشاعر من الشعر شلال
ليا هما يروي حياض الخمايل
يا الله بقول باثمن العرف يكتال
لا قالوا العراف ويش انت قايل
فرحة حماس الشعر في داخل البال
من وين ما جيته يجيك متهايل
قصة حديث المجد في وصف رجال
ما هو بحاجة مدح والشك زايل
لو تجتمع كل المعاني والاقوال
ف المدح.. تصغر عند واف الخصايل
سمه ولا سمه تحيات واجلال
سمه غلا دار وشعوب وقبايل
لها تحت حكمه مساحات وظلال
وعلى خطى دربه تسير الرحايل
في حب ابو متعب تباهى وتختال
صدق الولا ما هو خداع وتحايل
ابو اليتامى والأرامل والاطفال
يا كثر ما يصخي لهم بالجمايل
جعل لهم في فيه القلب مدهال
بين الضلوع اللي ما هي بالنحايل
من كثر ما يعطي لشعبه ولا زال
وده يجي دمه لكل الفصايل
غالي وبقلوب الملايين نزال
مع ان قلبه للملايين شايل
بحر العطا كله من الجال للجال
ماله شبيه الا صدوق المخايل
جبل ولكن بالوطا ماله امثال
روس الجبال تصير عنده نثايل
ظل الجبل في حظرة الشمس ينزال
وظلال عبدالله بعز القوايل
شامخ ويامن في ذرى بشته الذال
في ساعة فيها تجف البلايل
فارس ليا قالوا تبا الخيل خيال
نعم الاصيل اللي هوته الاصايل
هذا ليا قالوا لك اقوال وافعال
رجل يجي هرجه وكاد وصمايل
جم التواضع ملتجا من شكا الحال
في حال والاحال لطام عايل
قلبه مثل داره للاجواد منزال
ما حط بين الشعب والحكم حايل
تروى من افعاله مضامين الامثال
هذا الكلام اللي عليه الدلايل
احد يميل عدل ويعدل عقال
يلقى عن العدل الحقيقي بدايل
وعبدالله بعدله عن الحق ما مال
الرأس عادل والعقال متمايل
ضيدان المريخي